ខេត្តបន្ទាយមានជ័យ៖ យុទ្ធនាការរិតបន្តឹងត្រួតពិនិត្យជនបរទេសនៅខេត្តបន្ទាយមានជ័យលើកទី២ បានចាប់ផ្តើមដំណើរការអនុវត្តនោះហើយ កាលពីព្រឹកថ្ងៃទី២៥ ខែកញ្ញា ឆ្នាំ២០១៥ នៅសង្កាត់អូរអំបិល ក្រុងសិរីសោភ័ណ ។
ក្រុមការងារអគ្គនាយកដ្ឋានចំនួន៥ ដឹកនាំ ដោយអគ្គនាយកដ្ឋានអន្តោប្រវេសន៍ ក្នុងនោះក៏មានការចូលរួមពីនគរបាលអន្តោប្រវេសន៍នៃស្នងការដ្ឋាននគរបាលខេត្តបន្ទាយមានជ័យ បានត្រួតពិនិត្យជនជាតិវៀតណាមមករស់នៅ ធ្វើការនៅក្រុងសិរីសោភ័ណ ដែលបានកាន់កាប់ឯកសាររដ្ឋបាលខ្មែរ រួមមានសៀវភៅគ្រួសារ អត្តសញ្ញាណប័ណ្ណ សំបុត្រកំណើត ប័ណ្ណស្នាក់នៅជាដើម សរុបចំនួន៣៤នាក់ រហូតមកដល់ល្ងាចថ្ងៃដដែលនេះ ។
ដើម្បីយកឯកសាររដ្ឋបាលខ្មែរទាំងនោះផ្ទៀងផ្ទាត់ក្នុងគល់បញ្ជីនៅក្រសួងមហាផ្ទៃ ថាតើឯកសាររដ្ឋបាលដែលជានជាតិវៀតណាមទាំង៣៤នាក់នោះកំពុងកាន់កាប់ប្រើប្រាស់ ជាឯកសារក្លែងក្លាយខុសច្បាប់ ឬត្រឹមត្រូវតាមច្បាប់។ ក៏ប៉ុន្តែការចុះត្រួតពិនិត្យផ្ទៀងផ្ទាត់ឯកសារទាំងនោះ កាលពីព្រឹករហូតដល់ពេលល្ងាច ត្រូវបានលោកវរសេនីយ៍ឯក ឱ លន់ ស្នងការរងនគរបាលខេត្តទទួលការងារអន្តោប្រវេសន៍ប្រាប់ឱ្យដឹងថា សមត្ថកិច្ចមិនទាន់បានលទ្ធផលនៅឡើយនោះទេ ដោយរង់ចាំនៅថ្ងៃស្អែក នឹងទទួលបានលទ្ធផល ។
លោកស្នងការរងប្រាប់ឱ្យដឹងទៀតថាការចុះត្រួតពិនិត្យជនជាតិវៀតណាមរស់នៅក្នុងក្រុងសិរីសោភ័ណ សមត្ថកិច្ចជំនាញមិនទាន់ធ្វើចប់នៅឡើយនោះទេ ដោយនៅថ្ងៃស្អែក១ព្រឹកទៀត ទើបត្រួតពិនិត្យចប់សព្វគ្រប់ ហើយបន្ទាប់មកសមត្ថកិច្ចជំនាញបន្តទៅត្រួតពិនិត្យនៅស្រុកមង្គលបុរីជាបន្តបន្ទាប់ទៀត ។
លោកវរសេនីយ៍ឯក ឱ លន់ ស្នងការរងនគរបាលខេត្តទទួលការងារអន្តោប្រវេសន៍ប្រាប់ឱ្យដឹងទៀតថា យុទ្ធនាការត្រួតពិនិត្យជនបរទេសរស់នៅក្នុងខេត្តបន្ទាយមានជ័យធ្វើឡើងរយៈពេលយ៉ាងហោចណាស់១សប្តាហ៍ទើបចប់ ក្នុងនោះត្រូវអនុវត្តទូទាំងស្រុកក្រុងទាំង ៩ក្នុងខេត្តបន្ទាយមានជ័យតែម្តង ។
សូមបញ្ជាក់ថា ជុំវិញនៃការត្រួតពិនិត្យជនជាតិបរទេសមករស់នៅធ្វើការងារនៅខេត្តបន្ទាយមានជ័យ កាលពីត្រួតពិនិត្យលើកទី១ សមត្ថកិច្ចរកឃើញជនជាតិវៀតណាមចំនួនជាង២០នាក់ មកស្នាក់នៅធ្វើការគ្មានលិខិតស្នាមត្រឹមត្រូវខុសច្បាប់ ហើយជនជាតិវៀតណាមជាង២០នាក់ទាំងនោះក៏ត្រូវបានសមត្ថកិច្ចបណ្តេញចេញពីប្រទេសកម្ពុជានោះហើយ ។
ដោយឡែកសម្រាប់ការត្រួតពិនិត្យលើកទី២ គឺត្រួតពិនិត្យទៅលើជនជាតិបរទេស ជាពិសេសជនជាតិវៀតណាមដែលកាន់កាប់ឯកសាររដ្ឋបាលខ្មែរ និងត្រួតពិនិត្យទៅលើឯកសារ របស់ក្រសួងមហាផ្ទៃដែលបានផ្តល់ជូនចាត់ទុកជាអន្តោប្រវេសន៍ស្របច្បាប់ផងដែរ ។ ការចុះត្រួតពិនិត្យជំហ៊ានទី២ បើសិនសមត្ថកិច្ចរកឃើញថា ឯកសាររដ្ឋបាលខ្មែរដែលជនជាតិវៀតណាមកាន់កាប់គ្មាននៅក្នុងគល់បញ្ជីនៅក្រសួងមហាផ្ទៃ សមត្ថកិច្ចទុកថា ជាឯកសារក្លែងក្លាយ ហើយត្រូវធ្វើកំណត់ហេតុដកហូតយកមករក្សាទុក បន្ទាប់មកសមត្ថកិច្ចរាយការណ៍ទៅថ្នាក់លើដើម្បីអនុវត្តតាមគោលការណ៍ច្បាប់ជាបន្តបន្ទាប់ទៀត ៕
ដោយ៖ សំ វិច្ឆិកា
