ភ្នំពេញ៖ បងប្អូនប្រជាពលរដ្ឋខ្មែរឥស្លាម៤៤នាក់ ដែលជាភ្ញៀវ របស់ព្រះចៅសុលម៉ាន ព្រះមហាក្សត្រ នៃប្រទេសអារ៉ាប៊ីសាអូឌីត ទៅធ្វើបុណ្យហាជ្ជ នៅប្រទេសអារ៉ាប៊ីសាអូឌីត បានវិលត្រឡប់មកដល់កម្ពុជា ជាបណ្តើរៗវិញដោយសុវត្ថិភាព ក្នុងចំណោមបងប្អូនប្រជាពលរដ្ឋខ្មែរឥស្លាមចំនួន៦៨០នាក់ បានចេញដំណើរទៅចូលរួមពិធីបុណ្យហាជ្ជ កាលពីថ្ងៃទី១៦ ខែកញ្ញា ឆ្នាំ២០១៥ ដែលជាពិធីបុណ្យដ៏សំខាន់របស់បងប្អូនសាសនិកឥស្លាមនៅទូទាំងពិភពលោក ត្រូវតែគោរពប្រតិបត្ដិតាមជំនឿសាសនា ។
លោក អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងក្នុងឱកាសដែលលោកបានអញ្ជើញទៅទទួលអ្នកទាំង៤៤នាក់ ក្នុងចំណោមបងប្អូនខ្មែរឥស្លាម៦៨០នាក់ នៅអាកាសយានដ្ឋានអន្ដរជាតិភ្នំពេញ កាលពីថ្ងៃទី០១ ខែតុលានេះថា៖ បងប្អូនខ្មែរឥស្លាមចំនួន៦៨០នាក់ ដែលបានទៅចូលរួម ក្នុងពិធីបុណ្យហាជ្ជ នៅប្រទេសអារ៉ាប៊ីសាអូឌីត ក្នុងឆ្នាំ២០១៥នេះ ពុំមានបងប្អូនខ្មែរឥស្លាមណាម្នាក់ជូបគ្រោះថ្នាក់ ធ្វើឲ្យប៉ះពាល់ ដល់រូបរាងកាយ ឬបាត់បង់អាយុជីវិត ក្នុងឧបទ្ទវហេតុ រត់ជាន់គ្នា នៅទីក្រុងម៉ាក្កះ បានធ្វើឲ្យបាត់បងអាយុជីវិតមនុស្សចំនួន៧១០នាក់រួចមកនោះ ។
លោកបានរំលឹកថា៖ បងប្អូនពលរដ្ឋសាសនិកឥស្លាម ណាមម្នាក់មានលទ្ធភាព បានទៅចូលរួមប្រតិបត្តិ ក្នុងពិធីបុណ្យហាជ្ជនេះ គឺបុគ្គលនោះ មានបុណ្យកុសលខ្ពង់ខ្ពស់ណាស់ព្រោះពិធីនេះជាកាតព្វកិច្ចទី៥ ក្នុងចំណោមកាតព្វកិច្ចទាំង៥ របស់សាសនាឥស្លាម គឺបានបុណ្យច្រើនណាស់ ប្រសិនបើគ្រួសារណា មានលទ្ធភាព បានទៅធ្វើបុណ្យហាជ្ជ នៅប្រទេសអារ៉ាប៊ីសាអូឌីតបានម្ដង គ្រួសារនោះមានបុណ្យខ្ពស់បានឡើងទៅឋានន្ដរជាព្រះចម្រើនសម្បត្ដិ។ ជារៀងរាល់ឆ្នាំសាសនិកឥស្លាម នៅទូទាំងពិភពលោក ពីគ្រប់ទិសទីប្រមាណ៤លានទៅ៥លាននាក់ មានឱកាសអញ្ជើញទៅប្រារព្ធពិធីបុណ្យហាជ្ជនេះ នៅឯទីក្រុងម៉ាក្កះ ប្រទេសអារ៉ាប៊ីសាអូឌីត។
នៅឆ្នាំនេះ ពិធីបុណ្យហាជ្ជ មានប្រជាពលរដ្ឋសាសនិកឥស្លាម បានជួបឧបទ្ទវហេតុ រត់ជាន់គ្នា ធ្វើឲ្យបាត់បង់អាយុជីវិតប្រជាពលរដ្ឋប្រមាណជាង៧០០នាក់ ក្នុងខណៈដែលពិធីបុណ្យនេះមានរយៈពេលមួយសប្តាហ៍ នាចុងខែកញ្ញា ឆ្នាំ២០១៥នេះ តែហេតុការណ៏នេះ ជាសំណាងល្អ ពុំមានគ្រោះថ្នាក់ ដល់បងប្អូនសាសនិកខ្មែរឥស្លាមរបស់យើងនោះទេ ៕
ដោយ៖ សំរិត
