ភ្នំពេញ ÷  ចោរលួចម៉ូតូម្នាក់ត្រូវបានកម្លាំងសមត្ថកិច្ចនគរបាលប៉ូលិសខណ្ឌសែនសុខ និងខណ្ឌទួលគោកសហការគ្នា ស្ទាក់ចាប់បានភ្លាមៗកាលពីព្រឹកថ្ងៃអាទិត្យទី២ ខែកក្កដា ឆ្នាំ២០១៧ បន្ទាប់ជនរូបនេះបានធ្វើសកម្មភាពលួចម៉ូតូគេម្នាក់នៅក្នុងសង្កាត់ក្រាំងធ្នង់ ខណ្ឌសែនសុខរួចមក។

ជនសង្ស័យមានឈ្មោះ ព្រឹម សត្យា ភេទប្រុសអាយុ២២ឆ្នាំ គ្មានមុខរបរពិតប្រាកដស្នាក់នៅផ្ទះជួលម្តុំភូមិគោកឃ្លាង សង្កាត់គោកឃ្លាង ខណ្ឌសែនសុខ ជាជនជាប់ចោទដែលត្រូវបានចាប់ខ្លួនក្នុងការចោទប្រកាន់ថាជាចោរលួចម៉ូតូគេខាងលើ។

ដើមបណ្តឹងមានឈ្មោះ មី ចក់ អាយុ៤២ឆ្នាំ មុខរបរលក់ដូរ មានទីលំនៅភូមិក្រាំងអង្ក្រង សង្កាត់ក្រាំងធ្នង់ខណ្ឌសែនសុខជាជនរងគ្រោះម្ចាស់ម៉ូតូដែលត្រូវគេលួចក្នុងហេតុការណ៍នេះ បានរៀបរាប់ប្តឹងសមត្ថកិច្ចថា÷ នៅមុនពេលកើតហេតុគាត់បានចតម៉ូតូរបស់គាត់ម៉ាកហុងដា សង់ ស៊េរីឆ្នាំ២០១១ ពាក់ស្លាកលេខ ភ្នំពេញ 1AV 5060 ទុកនៅមុខផ្ទះ ដោយពុំបានដកសោរចេញទេ ព្រោះសំអាងថា នៅមុខផ្ទះហើយនិងកំពុងរវល់វៈបោចមាន់ធ្វើអោយប្រពន្ឋលក់ លុះភេចខ្លួនមួយភ្លែតស្រាប់តែបាត់ម៉ូតូទើបប្តឹងប៉ូលិសមូលដ្ឋាន ប៉ុស្ត៍ក្រាំងធ្នង់ អោយជួយអន្តរាគមន៍។

នៅពេលទទួលបានពត៌មាននេះភ្លាមប៉ូលិសមូលដ្ឋានបានស្រែកតាមវិទ្យុទាក់ទងដើម្បីអោយកម្លាំងប៉ូលិសក្នុងក្រុងភ្នំពេញទាំងអស់ជួយអន្តរាគមន៍តាមស្ទាក់ចាប់ជនដែលជិះម៉ូតូដូចភិនភាគខាងលើ ហើយមួយស្របក់ធំក្រោយមកត្រូវបានកងកម្លាំងប៉ូលិសខណ្ឌទួលគោកចាប់បានហើយប្រគល់អោយនគរបាលខណ្ឌសែនសុខ ជាម្ចាស់ទីតាំងកើតហេតុយកមកចាត់ការ ៕ តុង សីហា