ភ្នំពេញ ៖ អភិបាលរាជធានីភ្នំពេញលោក ឃួង ស្រេង បាន ប្រកាសជាថ្មីថា៖បញ្ហាចំបង នៅចំពោះមុខ គឺបញ្ហា លូ ប្រឡា ផ្លូវ និងសន្ដិសុខ សុវត្ថិភាពសាធារណៈ ព្រោះថា វាជារឿងមួយដែលពលរដ្ឋទាំងអស់ មិនថា អ្នកមាន ឬអ្នកក្រនោះទេ គឺត្រូវការ នូវសេនេះ ជាចាំបាច់បំផុតមុនអ្វីៗទាំងអស់។

ក្នុងដំណើរចុះពិនិត្យផ្ទាល់ដល់ ការរស់នៅ របស់ពលរដ្ឋសហគមន៍អន្លង់គងថ្មីនិងសហគមន៏ទូលសំបូរ ក្នុងទឹកដីខណ្ឌដង្កោ នៅព្រឹកថ្ងៃទី០៨ ខែកក្កដាឆ្នាំ២០១៧នេះ លោក ឃួង ស្រេង ថ្លែងយ៉ាងដូច្នេះថា ៖ បញ្ហាវាមានច្រើនណាស់ ប៉ុន្ដែអ្វីដែលជាចំណុចរួមដំបូងបំផុត គឺបញ្ហាសន្ដិសុខ អ្នកក្រក៏ត្រូវការសន្ដិសុខ អ្នកមានក៏ត្រូវការសន្ដិសុខ ប្រជាជនទូទៅក្នុងរាជធានីភ្នំពេញ គឺត្រូវការសន្ដិសុខ និយាយដោយឡែក ជារួមក្នុងព្រះរាជាណាចក្រកម្ពុជា ត្រូវការសន្ដិសុខចឹងយើងត្រូវគិតគូរពីបញ្ហាសន្ដិសុខជាចំបងនេះជាបញ្ហាចំបង គ្រប់គណៈអភិបាលត្រូវគិតបញ្ហានេះ»។

លោក ឃួង ស្រេង បញ្ជាក់ថា លោកបានប្រជុំជាមួយគណៈបញ្ជាការឯកភាពរាជធានីភ្នំពេញរួចហើយ កងកម្លាំងប្រដាប់អាវុធទាំង៣ប្រភេទ ត្រូវគិតពីបញ្ហាសន្ដិសុខនេះជាចំបង។ ដោយឡែក បញ្ហាអភិវឌ្ឍន៍គណៈបញ្ជាការឯកភាពនឹងធ្វើការដោះស្រាយតាមក្រោយ ដូចជា សណ្ដាប់ធ្នាប់សាធារណៈ ប្រព័ន្ធហេដ្ឋារចនាសម្ព័ន្ធ ប្រឡាយទឹក និងបញ្ហាផ្សេងៗជាច្រើនទៀត។

សូមបញ្ជាក់ថា  អភិបាលរាជធានីភ្នំពេញ ទើបឡើងកាន់តំណែងថ្មី លោកឃួង ស្រេង   ជាប្រធានគណៈ បញ្ជាការឯកភាពផងនោះ ធ្លាប់បានព្រមានធ្ងន់ៗនិងដាក់ បទបញ្ជា ឲ្យមេប៉ុស្តិ៍នគរបាលរដ្ឋបាល ក្នុងរាជធានីភ្នំពេញទាំងអស់ប្រឹងប្រែងបង្ក្រាបបទល្មើស ចោរឆក់ ចោរប្លន់ ក្នុងមូលដ្ឋានរបស់ខ្លួនឲ្យបានសកម្ម ដើម្បីកុំឲ្យប្រជាពលរដ្ឋភ័យខ្លាច ពិសេសបង្ក្រាបគ្រឿងញៀន បើធ្វើមិនបាន មិនមានសមត្ថភាព ត្រូវលាលែងពីតំណែងទៅ កុំឲ្យគេដកទាន់។

អភិបាលរាជធានីភ្នំពេញ បានលើកឡើងថា ប្រសិនបើមេប៉ុស្តិ៍ទាំងអស់ធ្វើមិនបាន សូមកុំឆ្លើយថា អត់កម្លាំង ត្រូវស្មើសុំទៅអធិការព្រោះថា កម្លាំងថ្មីៗចេញពីសាលា ច្រើន ណាស់ ហើយបើអធិការអត់ ត្រូវស្នើទៅស្នងការ៕

ដោយ៖ សំរិត