ភ្នំពេញ ៖ បុរសម្នាក់បានរងរបួសបែកក្បាលដោយសារខឹងអ្នកផឹកស៊ីនៅក្បែរផ្ទះហើយបានចាក់ម៉ាញ៉េឮៗខ្លាំងដេកពួនមិនបាន ក៏ដើរទៅប្រាប់គេកុំឱ្យបើកឮពេកផ្ទុយទៅវិញបែរជាគេវាយមួយដំបងឈើជ្រុងរយះថ្ងាសហូរឈាម ហើយជនបង្ករត់គេចខ្លួនបាត់ស្រមោល។
ហេតុការណ៍នេះកើតឡើង កាលពីវេលាម៉ោង០៩និង៤៥នាទីយប់ថ្ងៃទី៧ កក្កដា ស្ថិតនៅភូមិត្រពាំងពោធិ៍ សង្កាត់ចោមចៅ ខណ្ឌពោធិសែនជ័យ ។
សមត្ថកិច្ចឱ្យដឹងថា ជនរងគ្រោះឈ្មោះលាវ សុខគីម ភេទប្រុស អាយុ២៦ឆ្នាំ ជាអ្នកម៉ៅការសំណង់ ស្នាក់នៅផ្ទះជួលភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ ។ រីឯជនបង្កមិនស្គាល់ឈ្មោះទេ គ្រាន់តែដឹងថាជាអ្នកជិតខាងហៅថា តានំបុ័ង ភេទប្រុស អាយុ២៣ឆ្នាំ មុខរបរលក់នំបុ័ង ស្នាក់នៅផ្ទះជួលក្បែរកន្លែងកើតហេតុខាងលើ ។
ជនរងគ្រោះបានប្រាប់សនត្ថកិច្ចឲ្យដឹងថា មុនពេលកើតហេតុ គាត់និងជនបង្កស្នាក់នៅបន្ទប់ជួលក្បែរគ្នា ហើយគាត់បានផឹកស្រាបៀជាមួយបងប្អូនប្រុស-ស្រីគាត់មានគ្នា៤នាក់នៅផ្ទះជួល ។ ចំណែកជនបង្កបានផឹកស្រាបៀរជាមួយមិត្តភក្តិប្រុសរបស់គេមួយក្រុមដែរ។លុះ ពេលផឹកស៊ីស្រវឹងបន្តិច ភាគីជនបង្កបានចាក់ម៉ាញេឮខ្លាំងពេកទើបគាត់ បានដើរទៅប្រាប់ថា កុំឱ្យចាក់ម៉ាញ៉េឮខ្លាំងៗពេករំខានគេឯងស្តាប់អីមិនឮទេ។ គ្រាន់តែនិយាយបែបនេះសោះ បែរជាភាគីជនដៃដល់ខឹងហើយភ្លាមៗនោះជនបង្កបានទាញដំបងជ្រុងទៅវាយជនរងគ្រោះចំលើចិញ្ចើមហូរឈាមហើយរត់បាត់ស្រមោលតែម្តង ។
ក្រោយកើតហេតុ ជនរងគ្រោះទៅព្យាបាលរបួសភ្លាមៗ និងបានទៅដាក់ពាក្យបណ្តឹងនៅប៉ុស្តិ៍នគរបាលចោមចៅទាមទារសំណង២០០ដុល្លារជាថ្នូរនឹងថ្លៃពេទ្យ គ្រាដែលជនដៃដល់គេចខ្លួនមិនដឹងទៅណានោះ ៕ ប្រាថ្នា
