ខេត្តកំពង់ធំ ៖ ទោះបីររដ្ឋមន្រ្តីក្រសួងសុខាភិបាល លោក ម៉ម ប៊ុនហេង បានព្រមាន​ចាត់វិធានការ​ និងស្រាវជ្រាវ​យ៉ាងយក​ចិត្តទុកដាក់ ចំពោះគ្រូពេទ្យ​ជនជាតិចិនម្នាក់ និយាយភាសាខ្មែរ​ប៉ៃឡាំៗ ដែលធ្លាប់វះកាត់​ស្រ្តីខ្មែរម្នាក់ស្លាប់ នៅក្រុង​ពោធិ៍សាត់ ស្រាប់តែលេចមុុខ មកលួចបើកគ្លីនិក​ថ្មីមួយទៀត នៅទីរួម​ខេត្តកំពង់ធំ ដោយគ្មានច្បាប់អនុញ្ញាតិ ហើយត្រូវបានបញ្ឈប់ តែឥឡូវបែរជាមានពេទ្យស្ទើរភ្លើងផ្សេងទៀត មកបើកគ្លឺនិកជាច្រើននៅក្នុងស្រុកស្ទោងទៅវិញ។

មជ្ឈដ្ឋាននានាសុំសួរថា គ្រូពេទ្យស្ទើរភ្លើងទាំងនោះគេបើកគ្លីនិកដើម្បីពិសោធន៍ថ្នាំឬបើកដើម្បីព្យាបាលមនុស្ស បើគ្រាន់តែអ្នចេះលក់ថ្នាំក៏ព្យាបាលមនុស្សដែរ មិនខ្លាច គ្រោះថ្នាក់ដល់សុខភាព និងអាយុជីវិតពលរដ្ឋខ្មែរទេឬ? តើលោក ស្រី ស៊ីន ប្រធានមន្ទីរសុខាភិបាលខេត្តកំពង់ធំ ជាអ្នកបើកភ្លើងខៀវមែនដែរឬទេ?

សូមខ្សិបប្រាប់លោក ស្រី ស៊ីន ប្រធានមន្ទីរ ម្តងទៀត បើយាងតាមសេចក្តីរាយការណ៍ពីប្រជាពលរដ្ឋបានអះអាងថា គ្រាន់តែនៅផ្សារពពក ក្នុងឃុំពពក ស្រុកស្ទោង គេឃើញមានបើកគ្លីនិកលក់ថ្នាំពេទ្យ និងបើកព្យាបាលជម្ងឺ ដោយគ្មានច្បាប់ ចំនួនពីរកន្លែងទៅហើយ ដែលគេសង្ស័យថា មានការឃប់ឃិតគ្នាជាប្រព័ន្ធ ទើបមិនហ៊ានបង្ក្រាប ។

អ្នកតាមដានរឿងគ្រូពេទ្យស្ទើរភ្លើង ភាគច្រើនគេមិនទាន់ភ្លេចទេ ប៉ុន្មានខែកន្លងទៅនេះរដ្ឋមន្រ្តី ក្រសួងសុខា ភិបាលបានថ្លែងប្រាប់តាមប្រពន្ធផ្សព្វផ្សាយព័ត៌មានក្នុងស្រុក កាលពីរសៀល​ថ្ងៃទី១៧ ខែកុម្ភៈ ឆ្នាំ២០១៧ថា លោកនឹង​ឲ្យមានការ​ស៊ើបអង្កេត ស្រាវជ្រាវ និងចាត់វិធាន​ការយ៉ាងយកចិត្តទុកដាក់ ចំពោះករណីនេះ មិនបណ្តោយ​ឲ្យកើតមាន​ឡើងខុស​ច្បាប់ទៀត​ទេ។ការព្រមាន របស់លោករដ្ឋមន្រ្តីក្រសួងសុខាភិបាល បានកើតឡើង នៅពេលដឹងព័ត៌មានថា លោកគ្រូពេទ្យជនជាតិចិនឈ្មោះ វ៉ាន់ ចាន់ជូ ភេទប្រុស អាយុ៥២ឆ្នាំ បានលួចទៅបើក​គ្លីនិក​មួយទៀត នៅក្រុង​ស្ទឹងសែន ខេត្តកំពង់ធំ ដោយមានយីហោ «មន្ទីរសម្រាកព្យាបាល ក្រុងស្ទឹងសែន» ប៉ុន្តែមិនទាន់មាន​ច្បាប់ពេញ​លេញនៅឡើយ។

 រហូតមកដល់ថ្ងៃនេះ ប្រជាពលរដ្ឋភាគច្រើនបានលើកឡើងថា លោកប្រធានពេទ្យបង្អែកស្រុកស្ទោង ក៏ដូចជាប្រធាន និងអនុប្រធានពេទ្យខេត្តផងដែរ គឺគ្មានទេចំណាត់ការ ឬការបញ្ឈប់ ក្រុមគ្រូពេទ្យស្ទើរភ្លើងទាំងនោះ។

ផ្ទុយមកវិញ គឺពួកគេពូកែតែខាងដោះសារ ដើម្បីប្រយោជន៍ផ្ទាល់ខ្លួន ដោយមិនខ្វល់ពីគ្រោះថ្នាក់ដល់សុខភាព និងអាយុជីវិតពលរដ្ឋខ្មែរឡើយ ៕  ប៊ុន រិទ្ធី