ឈ្មួញដុះស្លែពូកែប្រើល្បិចលួចបន្លំឯកសារដឹកឈើលោតឆត្រ ម្តងនេះជាប់អន្ទាក់កងរាជអាវុធហត្ថលើផ្ទៃប្រទេស

ចែករំលែក៖

ខេត្តកំពង់ធំ ៖ ភាពអសកម្មរបស់មន្រ្ដីជំនាញតាំងពីមុនបោះឆ្នោតក្រុមប្រឹក្សាឃុំ-សង្កាត់ រហូតមកដល់ថ្ងៃនេះ បទល្មើសដឹកជញ្ជូនឈើចេញពីស្រុកសណ្តាន់ ជាពិសេសព្រៃឡង់ ឆ្លងកាត់មកស្រុកសន្ទុក ខេត្តកំពង់ធំ បានកើតមានឡើងជាបន្តបន្ទាប់ ដែលគេស័ង្ឃយថាសមត្ថកិច្ចពាក់ព័ន្ធគឺជាអ្នកឃុបឃិតបើកដៃឲ្យឈ្មួញធ្វើអ្វីៗតាមអំពើចិត្ត ដើម្បីផលប្រយោជន៍។

តាមប្រភពពត័មានច្បាស់ការមួយបានអោយដឹងថា ឡានដែលដឹកឈើគឺឡាន យីឌុប មិនមែនឡាននិងទេៗគ្រាន់តែជាឡានសាងឈើតែប៉ុណ្ណោះ ក្នុងនោះមាន លោក វុន អោយលុយទៅ លោក ភ័ក្រ ២០០០$ អ្នករត់ការច្បាប់ តែ លោក ភ័ក្រ មិនបានរត់ការធ្វើច្បាប់ទេបែបជាស៊ីដាច់លុយទៅវិញ ហើយលួចយកច្បាប់ផ្សេងដែលគេដឹករួចហើយមកសំអាង លុះពេល លោកសុត ម៉ារី នាយផ្នែករដ្នបាលព្រៃឈើកំពង់ថ្ម អោយយកច្បាប់នោះមកមើល បែរជាមិនហ៊ានយកមកទេ ទើបលោកសន្និដ្ឋានថា ការដឹកឈើនេះគ្មានច្បាប់អ្វីយកមកសំអាងនោះទេ។

ជារឿយៗមានសេចក្តីរាយការណ៍ថា មន្ត្រីរដ្ឋបាលព្រៃឈើ មន្ត្រីនគរបាល និងមន្ត្រីកងរាជអាវុធហត្ថមួយចំនួន ត្រូវបានគេដឹងថាទទួលបានផលប្រយោជន៍ជាប្រចាំពីក្រុមឈ្មួញដឹកជញ្ជូនឈើចេញពីព្រៃឡង់ ដោយខុសច្បាប់ បើមិនដូច្នោះទេប្រាកដជាពួកគេបង្ក្រាបយកស្នាដៃជាមិនខាន។ ជាក់ស្ដែងឈ្មួញណាដែលមិនបង់លុយតាមការកំណត់ ឬហ៊ានលោតធ័ត្រតែងតែទទួលរងនូវការបង្ក្រាបពីសមត្ថកិច្ចចម្រុះតាមដងផ្លូវ ក៏ដូចជាលើផ្លូវជាតិលេខ៦A ក្នុងខេត្តកំពង់ធំ ជៀសមិនផុតឡើយ។

ប្រភពពីប្រជាពលរដ្ឋក្នុងខេត្តកំពង់ធំ បានឲ្យដឹងថា លោក សៅ វណ្ណនី នាយផ្នែករដ្ឋបាលព្រៃឈើសណ្តាន់ មិនដែលយកចិត្តទុកដាក់បង្ក្រាបបទល្មើសដឹកជញ្ជូនឈើឆ្លងកាត់មុខស្នាក់ការរបស់ខ្លួននោះទេ។ ទើបតែកាលពីថ្ងៃទី២៧ ខែកក្កដា ឆ្នាំ២០១៧ លោក សុទ្ធ ម៉ារី នាយផ្នែករដ្ឋបាលព្រៃឈើកំពង់ថ្ម បានអះអាងថា ខាងជំនាញលោក បានសហការជាមួយកងរាជអាវុធហត្ថខេត្តកំពង់ធំ និងអាវុធហត្ថផ្ទៃប្រទេស ស្ទាក់បង្ក្រាបរថយន្តយីឌុប ដឹកឈើ ជាង១០ម៉ែត្រគូបអត់ច្បាប់ ១គ្រឿង មកពីស្រុកសណ្តាន់ កាលវេលាម៉ោង ៨-៩ យប់ក្នុងថ្ងៃទី ២៦ ខែ កក្កដា ២០១៧ រថយន្ត និងឈើយកមករក្សាទុកនៅផ្នែកកំពង់ថ្ម។

សមត្ថកិច្ចខ្លះបានខ្សិបប្រាប់ថា លោក សៅ វណ្ណនី នាយផ្នែករដ្ឋបាលព្រៃឈើសណ្តាន់ គិតតែរឿងប្រមូលលុយដាក់ហោប៉ាវប៉ុណ្ណោះ មិនដែលយកចិត្តទុកដាក់បង្ក្រាបបទល្មើសតាមតួនាទីរបស់ខ្លួនឡើយ។ទាក់ទិននិងរឿងខាងលើនេះអ្នកយកព័ត៌មានយើង សោកស្តាយណាស់ ដោយមិនបានស្តាប់ពាក្យដោះសារបស់លោក សៅ វណ្ណនី នាយផ្នែករដ្ឋបាលព្រៃឈើសណ្តាន់នោះឡើយ ព្រោះទូរស័ព្ទខលចូលរោរ៍ច្រើនដងកាលពីរសៀលទី២៧នេះ តែលោក សៅ វណ្ណនី នាយផ្នែកមិនលើក។

ប្រភពពីមន្ត្រីសាលាខេត្តកំពង់ធំម្នាក់ បានឲ្យដឹងថា ព្រឹកថ្ងៃ២៧នេះ ផ្នែករដ្ឋបាលព្រៃឈើកំពង់ថ្ម ឃាត់រថយន្តដឹកឈើគ្រញូងឆ្លងកាត់ខេត្តកំពង់ធំ ចំនួន១គ្រឿងទៀត។ លោកបន្តថា មានពេលខ្លះ មានបញ្ជារបស់ព្រះរាជអាជ្ញាអមសាលាដំបូងខេត្តកំពង់ធំ ទើបលោក សៅ វណ្ណនី នាយផ្នែករដ្ឋបាលព្រៃឈើសណ្តាន់ និងលោក សុត ម៉ារី បង្ក្រាបរថយន្តដឹកជញ្ជូនឈើខុសច្បាប់ទាំងនោះ។

មន្ត្រីរាជការក្នុងខេត្តកំពង់ធំខ្លះទៀត បានរិះគន់ថា លោក នាយអធិការដ្ឋានរដ្ឋបាលព្រៃឈើខាងជើងបឹងទន្លេសាប គឺជាបើកដៃឲ្យលោក តឹប ញាតា នាយខណ្ឌរដ្ឋបាលព្រៃឈើខេត្តកំពង់ធំ និងលោក សៅ វណ្ណនី នាយផ្នែករដ្ឋបាលព្រៃឈើសណ្តាន់ ក៏ដូចលោក សុទ្ធ ម៉ារី នាយផ្នែករដ្ឋបាលព្រៃឈើកំពង់ថ្មដែរ ធ្វើអ្វីៗស្រេចតែនឹងចិត្តនឹកឃើញ៕ប៊ុន រិទ្ធី