ខេត្តកំពង់ធំ ៖ កាលពីវេលាម៉ោង២៤.៥០នាទីរំលងអាត្រាតថ្ងៃទី០១ ឈានចូលថ្ងៃទី២ ខែសីហា ឆ្នាំ២០១៧ មានករណីគ្រោះថ្នាក់ចរាចរណ៍ រវាងរថយន្តបុកនិងម៉ូតូក្នុងទិសដៅបញ្ចាស់ទិសគ្នា ហេតុការណ៍នេះបានកើតឡើងនៅចំណុចកែងមុខវត្តឬស្សីជះ ឃុំត្បែង ស្រុកកំពង់ស្វាយ ខេត្តកំពង់ធំ បណ្ដាលអោយបុរស២នាក់ជាបុគ្គលិកភោជនីយដ្ឋាន សម្រស់ព្រៃប្រស់ ស្លាប់យ៉ាងអាណោអាធម្ម នៅកន្លែងកើតហេតុ។
តាមប្រភពពត័មានពីសមត្ថកិច្ចបានអោយដឹងថាអ្នកបង្កឡើងដោយ យន្តម៉ាក ហាយលិនឌឺ ពណ៍ទឹកប្រាក់ពាក់ផ្លាក់លេខសៀមរាប ២A៧៣៣៩ អ្នកបើកបរចុះរត់បាត់ មិនស្គាល់អត្តសញ្ញាណ ចំណែកអ្នកបើកបរម៉ូតូC១២៥ពណ៍ខ្មៅពាក់ផ្លាក់លេខកំពង់ធំ១F៤៨៥០បើកបរដោយ ឈ្មោះណុប ស្រីអូន ភេទប្រុស អាយុ៣២ឆ្នាំ មុខរបរ បុគ្គលិក ភោជនីយដ្ឋាន សម្រស់ព្រៃប្រស់(ស្លាប់កន្លែង) អ្នករួមដំណើរ ឈ្មោះ ឆែម ប៊ុនឈិន ភេទប្រុសអាយុ ២៤ឆ្នាំមុខរបរ ជាបុគ្គលិក ភោជនីយដ្ឋាន សម្រស់ព្រៃប្រស់ រស់នៅ ភូមិនាងពុក ឃុំបាក់ខ្លង ស្រុកមណ្ឋលសីម៉ា ខេត្តកោះកុង(ស្លាប់នៅកន្លែងកើតហេតុ) ។
ក្រោយកើតហេតុសមត្ថកិច្ចបានធ្វើការវាស់វែង ធ្វើកំណត់ហេតុប្រមូលវត្ថុតាង យកទៅរក្សាទុកនៅអធិការដ្ឋាននគរបាលស្រុកកំពង់ស្វាយ បើកការស្រាវជ្រាវរកជនបង្កមកដោះស្រាយគ្នាតាមច្បាប់ ចំណែកសាកសព ប្រគល់អោយ សាច់ញាតិក្រុមគ្រួសារយកទៅបុណ្យតាមប្រៃណី៕ប៊ុនរិទ្ធី
