អាជ្ញាធរហ្វីលីពីនបញ្ជាក់ថា ខ្មាន់កាំភ្លើងបានចាប់ជំរិតម្ចាស់ភោជនីយដ្ឋានសញ្ជាតិអ៊ីតាលីម្នាក់ស្ថិតនៅភាគខាងត្បូងប្រទេសហ្វីលីពីនកាលពីថ្ងៃទី៨ ខែតុលា ឆ្នាំ២០១៥ ដែលករណីនេះ អាជ្ញាធរបានសម្តែងការព្រួយបារម្ភថា ជនរងគ្រោះទំនងត្រូវក្រុមខ្មាន់កាំភ្លើងនាំយកទៅកាន់ដំណាក់កោះដែលគ្រប់គ្រងដោយក្រុមឧទ្ទាមអាប៊ូសាយ៉ាប់(Abu Sayyaf) នោះហើយ ។
អ្នកនាំពាក្យកម្លាំងយោធាហ្វីលីពីនបានអះអាងថា ខ្មាន់កាំភ្លើង៦នាក់បន្លាំខ្លួនធ្វើជាអតិថិជនចូលទៅក្នុងភោជនីយដ្ឋាន រួចធ្វើសកម្មភាពចាប់ជំរិតម្ចាស់ភោជនីដ្ឋានសញ្ជាតិអ៊ីតាលីឈ្មោះ Rolando del Torchio កាលពីល្ងាចថ្ងៃទី៧ ខែកក្កដា ខណៈដែលកំពុងមានមនុស្សកកកុញចូលភោជនីយដ្ឋានទទួលទានភីស្សានៅក្នុងហាង ស្ថិតនៅទីក្រុងកំពង់ផៃ Dipolog ។
លោក Roy Vincent Trinidad មន្ត្រីយោធាជាន់ខ្ពស់បានបញ្ជាក់ប្រាប់ទីភ្នាក់ងារព័ត៌មាន AFP ថា ក្រុមខ្មាន់កាំភ្លើងបានចាប់ញាត់បុរសអាយុ៥៦ឆ្នាំម្នាក់នេះបញ្ចូលក្នុងរថយន្តមួយគ្រឿងដែលបញ្ឆេះចាំរួចជាស្រេច ហើយបានបើកចេញក្នុងល្បឿនលឿនឆ្ពោះទៅកាន់ទីប្រជុំជន Manukan ចម្ងាយប្រមាណ៥០គីឡូម៉ែត្រពីទីតាំងចាប់ជំរិត ដែលនៅទីនោះជនរងគ្រោះត្រូវនាំតាមអូប័រចាកចេញទៅតាមផ្លូវទឹក ។
ប្រភពបានបន្តថា កងកម្លាំងទាហានជើងទឹកបានចេញប្រតិបត្តិការភ្លាមៗនៅបន្ទាប់ពីទទួលបានដំណឹងថា អូរប័រចម្លែកខុសច្បាប់ដែលគួរឲ្យសង្ស័យកំពុងធ្វើចរាចរណ៍នៅលើផ្ទៃទឹកក្នុងតំបន់ឈូងសមុទ្រ Zamboanga ឆ្ពោះទៅកាន់ភាគត្បូងកោះ Jolo ចម្ងាយប្រមាណ៤០០គីឡូម៉ែត្រនោះបាត់ស្រមោល ។
ដែនកោះ Jolo ជាបន្ទាយយ៉ាងសំខាន់របស់ក្រុមឧទ្ទាមអាប៊ូសាយ៉ាហ្វដែលមានទំនាក់ទំនងជាមួយក្រុមភេរវកម្មអាល់កៃដា ។ រដ្ឋាភិបាលហ្វីលីពីនបានរកឃើញថា ក្រុមឧទ្ទាមនេះហើយដែលស្ថិតនៅពីក្រោយការវាយប្រហារសម្លាប់មនុស្សយ៉ាងរង្គាលកើតឡើងនៅក្នុងទឹកដីហ្វីលីពីននាពេលកន្លងមក ក៏ដូចជាការចាប់ជំរិត និងសកម្មភាពកាត់ក្បាលអ្នកទេសចរណ៍បរទេស ព្រមទាំងអ្នកកាន់សាសនាគ្រឹស្ទផងដែរ ៕
ប្រែសម្រួល៖ ថាច់ យ៉ាត
