ភ្នំពេញ៖ បុរសម្នាក់ដែលគេស្គាល់ថាជាម្ចាស់សាឡង់បូមខ្សាច់បានរអិលជើងធ្លាក់ពីលើសាឡង់លង់ទឹកស្លាប់ខណៈរូបគេស្រវឹងស្រា ហើយដើរជាន់ទុយោរអិលជើងដួលបោកក្បាលធ្លាក់ចូលក្នុងទឹកបាត់លុះព្រឹកឡើងទើបគេរាវរកឃើញ ។
ហេតុការណ៍នេះបានកើតឡើងកាលពីម៉ោងជាង១១យប់ថ្ងៃទី៨ ខែតុលា ឆ្នាំ២០១៥ នៅចំណុចច្រាំងទន្លេ មុខវត្តគៀនឃ្លាំង ស្ថិតក្នុងភូមិគៀនឃ្លាំង សង្កាត់-ខណ្ឌជ្រោយចង្វារ ។
សមត្ថកិច្ចនគរបាលប៉ុស្តិ៍បានឲ្យដឹងថា បុរសដែលលង់ទឹកស្លាប់ខាងលើមានឈ្មោះ ស៊ុនពិសិដ្ឋ អាយុ២៧ឆ្នាំ ស្នាក់នៅភូមិផ្សារតូចសង្កាត់ទួលសង្កែ ខណ្ឌឫស្សីកែវ ។
ប្រភពពត៌មានពីក្រុមគ្រួសារសព បានឲ្យដឹងថានៅមុនពេលកើតហេតុពួកគេទាំង២នាក់បាននាំគ្នាផឹកសីុរហូតស្រវឹងទាំងអស់គ្នារួចនាំគ្នាមកដេកចាំសាឡង់ ខណះកម្មកបានសម្រាក់ការងារទៅលេងស្រុកកំណើតនៅរដូវបុណ្យភ្ជុំបិណ្ឌអស់។
ប្រភពបន្តថា ពេលពួកគេឡើងមកដល់លើសាឡង់ ជនរងគ្រោះបានដើរជាន់លើទុយោរអិលជើងដួលបោកក្បាលទៅនឹងគែមសាឡង់ រួចធ្លាក់ចូលក្នុងទឹកលិចបាត់។ ក្រោយពេលកើតហេតុភ្លាមៗ មិត្តភ័ក្តិជនរងគ្រោះឃើញក៏បានលោតចុះទៅក្នុងទឹករាវរកតែរកមិនឃើញសោះ។
ក្រោយពីពេលរាវរកមិនឃើញ មិត្តភ័ក្តិជានរងគ្រោះបានទូរសព្ទ័ប្រាប់ក្រុមគ្រួសាររបស់ជនរងគ្រោះឲ្យជួលទូកខ្មែរឥស្លាម មករាវរកក្នុងតម្លៃ៧០០ដុល្លារ ដោយមុជរាវតាំងពីម៉ោងកើតហេតុហូតដល់ព្រឹកព្រលឹមទើបរកសាកសពឃើញរួចស្រង់យកមកតំកល់ទុកនៅវត្តព្រែកតាគង់ ស្ថិតក្នុងសង្កាត់ព្រែកតាសេក ខណ្ឌជ្រោយចង្វា ដើម្បីធ្វើបុណ្យតាមប្រពៃណី ៕
ដោយ៖ ជ្រោយពេជ្រ
