ភ្នំពេញ៖ ជនសង្ស័យម្នាក់ក្នុងចំណោមបក្ខពួកពីរនាក់ទៀតត្រូវបានកម្លាំងសមត្ថកិច្ចប៉ុស្តិ៍ផ្សារដើមថ្កូវចាប់ឃាត់ខ្លួន ក្រោយពីរូបគេបានធ្វើសកម្មភាពកាប់ប្លន់យកយកម៉ូតូឌ្រីមសង់C125 សេរីឆ្នាំ២០១៥ ពីយុវជនពីរនាក់និងនារីម្នាក់ហើយប៉ាក់ពួកពីរនាក់ទៀតយកម៉ូតូជនរងគ្រោះជិះរត់គេចខ្លួនបាត់ ។

ហេតុការណ៍កាប់ប្លន់នេះដែរបានកើតឡើងកាលពីវេលាម៉ោង២២និង៣០នាទីយប់នៅចំណុចក្រោមស្ពានអាកាសក្បាលថ្នល់ ស្ថិតក្នុងសង្កាត់ផ្សារដើមថ្កវ ខណ្ឌចំការមន ។ ជនរងគ្រោះមានឈ្មោះ សុខ ម៉ៃ អាយុ២៣ឆ្នាំ មានមុខរបរជាជាងកាត់សក់ ស្នាក់នៅសង្កាត់ព្រែកប្រា ។

បើតាមការរៀបរាប់របស់ជនរងគ្រោះបានអោយដឹងថាមុនពេលកើតហេតុរូបគេបានជិះម៉ូតូមួយគ្រឿងម៉ាកហុងដាឌ្រីមសង់C125 ពណ៍ខ្មៅ ពាក់ស្លាកលេខ ភ្នំពេញ1FA-3487 ឌុបសង្សានិងមិត្តភ័ក្រម្នាក់ទៀតធ្វើដំណើរតាមបណ្ដោយផ្លូវព្រះមុន្នីវង្សទិសដៅពីលិចទៅកើត ហើយដោយសារតែខ្លួននិងសង្សាបានទាស់ពាក្យសំដីដាក់គ្នាពេលមកដល់ចំណុចក្រោមស្ពានអាកាសក្បាលថ្នល់ក៏ឈប់ម៉ូតូនិយាយគ្នាខណៈពេលដែលកំពុងនិយាយគ្នាស្រាប់តែលិចមុខជនសង្ស័យមួយក្រុមមានគ្នាបីនាក់ប្រដាប់ដោយដាវសាំមូរ៉ៃមួយដើមដើរមកកាប់ខ្លួននិងមិត្តភ័ក្រហើយខ្លួននិងមិត្តភ័ក្របានតដៃជាមួយជនសង្ស័យវិញដែរ តែពេលដែលកំពុងប្រតាយប្រតប់ជាមួយជនសង្ស័យម្នាក់ដែលកាន់សាំមូរ៉ៃ ត្រូវបក្ខពួកពីរនាក់ទៀតឡើងជិះម៉ូតូខ្លួនគេចខ្លួនបាត់។ ចំណែកជនសង្ស័យម្នាក់ដែលឡើងជិះម៉ូតូមិនទាន់បានកាន់ដាវសាំមូរ៉ៃរត់មកដល់ច្រកចូលផ្លូវ៦០ម៉ែត្រទើបខ្លួននិងមិត្តភ័ក្រដេញចាប់បានប្រគល់ឲ្យសមត្ថកិច្ចតែម្ដង ។

ក្រោយកើតហេតុជនរងគ្រោះបានទៅដាក់ពាក្យបណ្ដឹងនៅប៉ុស្ដិ៍រដ្ឋបាលនគរបាល ផ្សារដើមថ្កូវ ដើម្បីកំណត់មុខសញ្ញាជនសង្ស័យដែលរត់គេចខ្លួនរួចស្រាវជ្រាវចាប់យកមកចាត់ការតាមនិតិវិធីច្បាប់។ ចំនែកជនសង្ស័យម្នាក់ដែលចាប់បានសមត្ថកិច្ចកំពុងកសាងសំណុំរឿងបញ្ជូនទៅតុលាការ ចាត់ការតាមផ្លូវច្បាប់ ៕

ដោយ៖ ព្រែកជ័យ