ភ្នំពេញ ÷ កម្លាំងគរបាលខណ្ឌសែនសុខបានឃាត់ខ្លួនបុរសម្នាក់ ក្រោយពីរកឃើញថ្នាំញៀនចំនួន៥កញ្ចប់នៅក្នុងហោប៉ៅខោរបស់គេ ហើយត្រូវចោទពីបទជួញដូគ្រឿងញៀនដោយខុសច្បាប់ខណៈគាត់កំពុងជិះម៉ូតូតាមផ្លូវ ។
ការឃាត់ខ្លួនជននេះកាលពី ម៉ោង១ និង៣០នាទី រំលងអាធ្រាត្រឈានចូលថ្ងៃទី១២ ខែកញ្ញា ឆ្នាំ២០១៧ នៅម្តុំមុខវត្តសំរោងអណ្តែត សង្កាត់ភ្នំពេញថ្មី ។
ប៉ូលីសបានប្រាប់ថាជនសង្ស័យដែលឃាត់ខ្លួន នោះមានឈ្មោះ រ័ត្ន សុភ័ក្ត ភេទប្រុសអាយុ៣២ឆ្នាំ គ្មានមុខរបរពិត មានទីលំនៅម្តុំ សង្កាត់ចោមចៅ ខណ្ឌពោធិសែនជ័យ។
លោក ដួង វណ្ណៈ នាយប៉ុស្ត៍នគរបាលរដ្ឋបាល សង្កាត់ភ្នំពេញថ្មី បានអោយដឹងថា ការឃាត់ខ្លួនជនសង្ស័យខាងលើ ធ្វើឡើងខណៈពេលដែល សមត្ថកិច្ចកំពុងយាមល្បាតក្នុងមូលដ្ឋាន បានប្រទះឃើញជននេះកំពុងជិះម៉ូតូនៅរំលងអាធ្រាត្រមានការសង្ស័យក៏ឃាត់អោយឈប់ ឆែកឆេរកឃើញថ្នាំញៀនចំនួន៥កញ្ចប់តូចនៅក្នុងហោប៉ៅខាងស្តាំរបស់គេទើបឃាត់ខ្លួនយកមកសួរនាំតែម្តង។
ប៉ូលិសបានចោទប្រកាន់ជនរូបនេះថា ជាអ្នករកស៊ីជួញដូរថ្នាំញៀនដោយខុច្បាប់ហើយបានកំពុងតែប្រើជំនាញដើម្បីសាកសួររកប្រភពដែលគេបានទិញឬនាំយកថ្នាំញៀននេះបន្តមកពីប្រភពណា ដែល ពេលនេះជនជាប់ចោទកំពុងលាក់បាំង ៕ តុង សីហា
