កណ្ដាល ៖ យុវជនម្នាក់ជិះម៉ូតូក្នុងល្បឿនលឿនឈប់មិនទាន់ជ្រុលបុកជាមួយគូថរថយន្តពីក្រោយបត់ឆ្លងផ្លូវពេញមួយទំហឹង បណ្ដាលឲ្យយុវជនជាអ្នកជិះម៉ូតូដួលស្លាប់ភ្លាមៗយ៉ាងអណោចអធ័ម ។ ហេតុការណ៍គ្រោះថ្នាក់ចរាចរណ៍បានកើតឡើងនៅវេលាម៉ោង៨និង៥០នាទី ថ្ងៃអង្គារ ទី១២ ខែកញ្ញា ឆ្នាំ២០១៧ លើកំណាត់ផ្លូវលេខ៣៤ ស្ថិតក្នុងភូមិអន្លង់ព្រីង ឃុំដើមឬស ស្រុកកណ្តាលស្ទឹង ខេត្តកណ្តាល ។
មន្ត្រីនគរបាលចរាចរណ៍ស្រុកកណ្ដាលស្ទឹងបានឲ្យដឹងថា ជនរងគ្រោះស្លាប់បាត់បង់ជីវិតឈ្មោះ មាំង ប៊ុនឆឺងភេទប្រុស អាយុ២០ឆ្នាំ មានទីលំនៅភូមិអន្លង់ព្រីង ឃុំ ដើមឬស ស្រុកកណ្ដាលស្ទឹង ខេត្តកណ្ដាល ជិះម៉ូតូម៉ាកYAMAHA EYFITER ពណ៌ខ្មៅលាយសរ គ្មានស្លាកលេខ ។ ចំណែករថយន្តមិនស្គាល់ម៉ាកបើកបរដោយជនមិនស្គាល់អត្តសញ្ញាណ បើករត់គេចខ្លួនក្រោយពេលកើតហេតុ ។
ប្រភពដដែលបន្តថា នៅមុនពេលកើតហេតុសាក្សីបានឃើញជនរងគ្រោះជាអ្នកជិះម៉ូតូ ជិះក្នុងទិសដៅពីលិចទៅកើត ដោយល្បឿនលឿន លុះជិមកដល់ចំណុចកើតហេតុស្រាប់តែមានរថយន្តមួយគ្រឿងមិនស្គាល់ម៉ាកបើកបត់ឆ្លងផ្លូវពីកើតឆ្ពោះមកផ្លូវប្រឡាយ ស្របគ្នានោះដែរ ក៏មានម៉ូតូជនរងគ្រោះជិះក្នុងល្បឿនលឿនផង ឈប់មិនទាន់ជាន់ហ្រ្វាំមិនជាប់បានជ្រុលទៅបុកគូថរថយន្តពីក្រោយពេញមួយទំហឹង បណ្ដាលឲ្យជនរងគ្រោះដួលបោកទៅនិងផ្លូវស្លាប់ភ្លាមៗនៅនិងកន្លែងកើតហេតុ ។ ចំណែករថយន្តបានបើករត់គេចខ្លួនបាត់ស្រមោលក្រោយពេលកើតហេតុ ។
ក្រោយពីមានហេតុការណ៍កើតឡើង កម្លាំងនគរបាលចរាចរណ៍ស្រុកកណ្ដាលស្ទឹង បានចុះមកធ្វើការពិនិត្យវាស់វែងនិងកសាងឯកសារដកហូតយកម៉ូតូជនរងគ្រោះមករក្សាទុកនៅអធិការដ្ឋាននគរបាលស្រុកដើម្បីចាត់ការតាមច្បាប់ ។ រីឯសាកសពជនរងគ្រោះត្រូវបានសមត្ថកិច្ចប្រគល់ឲ្យក្រុមគ្រួសារចាត់ចែងធ្វើបុណ្យតាមប្រពៃណី ។ ចំពោះរថយន្តដែលបើករត់គេចខ្លួន សមត្ថកិច្ចកំពុងធ្វើការស្រាវជ្រាវដើម្បីចាត់ការបន្ត ៕ស្អាងជ័យ
