ភ្នំពេញ៖ នៅទីបំផុតតារាកំប្លែងមេម៉ាយកូន១អ្នកនាងស្រេង សុកាន់ដា ហៅនាង ខ្ញុង បានសារភាពព្រមទទួលស្គាល់ថា ខ្លួនពិតជាមានទំនាក់ទំនងស្នេហ៍ស៊ីជម្រៅជាមួយនាយកៃដពិតមែន ហើយថែមទាំងបានសែនព្រេនជាមួយគ្នា នៅមុខចាស់ទុំទាំងសងខាងនិងកំពុងតែរស់នៅជាប្ដីប្រពន្ធហើយដែរ។
ក្រោយពីធ្លាយរឿងចំណងស្នេហាក្រៅឆាករវាងនាងខ្ញុង និងនាយពាក់មី អស់រយៈពេលជាយូ ស្រាប់តែមានលេចធ្លាយរឿងស្នេហារវាង នាងខ្ញុង និងនាយកៃដដែលគេស្ទើតែមិនជឿ។ តែពេលនេះភាគីសងខាងហាក់ទទួលស្គាល់ហើយថាវាគឺជារឿងពិតខ្ញុងថ្លែងថា ដំបូងឡើយខ្លួនគិតថា ចង់លាក់បាំងខ្លាចមហាជនដឹងថា មានប្ដីហើយអាចធ្លាក់ប្រជាប្រិយភាព ប៉ុន្តែដោយដំណឹងស្នេហានេះមហាជនបានដឹងខ្លះហើយ ក៏ព្រមទម្លាយឲ្យអស់សាច់រឿងតែម្ដងទៅ។នាងបានបន្តឲ្យដឹងទៀតថា អ្នកទាំងពីរបានសម្រេចចិត្តសែនព្រេន ក្រាបផ្ទឹមសុំគ្នាធ្វើជាប្ដីប្រពន្ធ នៅមុខចាស់ទុំទាំងសងខាង កាលពីថ្ងៃទី៣០ ខែ កក្កដា ឆ្នាំ ២០១៧ ចំថ្ងៃថ្ងៃឡើងផ្ទះតែម្ដង ប៉ុន្តែដំណឹងនេះ ខ្លួនមិនដែលទម្លាយឲ្យមហាជនបានដឹងឡើយ។ អ្នកនាង ដើមនាងនិងនាយកៃដដំបូងឡើយគឺរាប់អានគ្នាធម្មតាទេ ក្នុងរយៈពេលជាច្រើនឆ្នាំ ប៉ុន្តែពន្លកស្នេហ៍បានដុះចេញឡើងក្នុងរយៈពេលចុងក្រោយនេះគឺបន្ទាប់ពីការស្វែងយល់ចិត្តគ្នានិងគិតថាពួកគេជាមេម៉ាយ និងពោះម៉ាយស្រាប់ទើបមិនមានពិធីរៀបការធំដុំ។ ទោះបីជាចំណងស្នេហ៍របស់ ខ្ញុង និង នាយកៃដ ធ្វើឡើងលក្ខណៈសែនព្រេនបែបនេះក្ដី អ្នកទាំងពីរគ្រោងនាំគ្នាទៅចុះសំបុត្រអាពាហ៍ពិពាហ៍ជាមួយគ្នាក្នុងពេលឆាប់ៗនេះដែរ។
នាងរំពឹងទុកថាកៃដជាស្វាមីនឹងមើលថែទាំនាងនិងកូនបានល្អ មិនធ្វើឲ្យនាងខកចិត្តឡើយ ហើយក៏នឹងបំភ្លេចអតីតកាលដែលមិនល្អទាំងអស់ចោលផងដែរ៕
ដោយ៖ វឌ្ឍនា
