ភ្នំពេញ៖ រថយន្តនឹងម៉ូតូប៉ះគ្នានៅតាមបណ្តោយផ្លូវជាតិលេខ៦ ​ចន្លោះ​ស្ពា​​នលេខ៨និងលេខ៩ បណ្តាលឲ្យបុរស ២នាក់រងរបួសធ្ងន់ ។
ហេតុការណ៍នេះបានកើតឡើងកាលពីម៉ោង៦និង៣០នាទីព្រលប់ថ្ងៃទី១៤ ខែតុលា ឆ្នាំ២០១៥ ស្ថិតនៅក្នុងភូមិក្តីចាស់ សង្កាត់បាក់​​ខែង ខណ្ឌជ្រោយ​ច​ង្វា ។​

ប្រភពព័ត៌មាននៅ​កន្លែងកើតហេតុបានឲ្យដឹងថា មុនពេលកើតហេតុគេបានឃើញបុរស២នាក់​ បានបើកម៉ូតូឌុបគ្នាម៉ាកហុងដាឌ្រីម សេ១២៥ ស៊េរីឆ្នាំ២​០០៣ ​ព​ណ៌ខ្មៅ ពាក់ស្លាកលេខពោធិ៍សាត់1A-9684 បើកបរក្នុងទិសដៅជើងទៅត្បូង រួចបត់ឆ្វេងឆ្លងផ្លូវ ភ្លាមនោះស្រាប់តែមានរថយន្ត​ម៉ាកតូយ៉ូតាកាម​រី​ ស៊េរីឆ្នាំ៩៥ ពណ៌ស្លែ ពាក់ស្លាកលេខភ្នំពេញ2I-2863​ ធ្វើដំណើរពីត្បូងទៅជើងបានបុកម៉ូតូពេញទំហឹងអូសជាង៥ម៉ែត្រ ចំណែកអ្នកបើកម៉ូតូ​ផ្លោ​ងបោកនឹងកញ្ចក់រថយន្តផ្ទាំងខាងមុខបែកផុងធ្លាក់ចូលក្នុងរថយន្តរងរបួសធ្ងន់ធ្ងរ និងម្នាក់ទៀតខ្ទាតចេញក្រៅរងរបួសធ្ងន់ ចំណែកអ្នកបើករថ​យ​ន្តបង្កបាន​បើកទ្វាររថយន្តរត់គេចខ្លួនបាត់ស្រមោល ។

ក្រោយពេលកើតហេតុសមត្ថកិច្ចនគរបាលចរាចរខណ្ឌបានយករថយន្តដឹកជនរងគ្រោះទាំងពីរនាក់ទៅសង្គ្រោះនៅមន្ទីរ​ពេទ្យ​កា​លម៉ែត រីឯរថយន្តនឹងម៉ូតូ ត្រូវបានសមត្ថកិច្ចនគរបាលចរាចរធ្វើការវាស់វែង​យកទៅរក្សាទុកនៅការិយាល័យនគរបាលចរាចរផ្លូវគោក រង់ចាំដោះស្រាយគ្នាជាក្រោយ ៕

ដោយ៖ ជ្រោយពេជ្រ