ភ្នំពេញ៖ ជនសង្ស័យម្នាក់ត្រូវបានសមត្ថកិច្ចនគរបាលបុស្ដិ៍ទួលសង្កែឃាត់ខ្លួន ពីបទលួច កាលពីវេលម៉ោង១០ព្រឹក ថ្ងៃទី១៥ ខែតុលា ឆ្នាំ២០១៥ នៅចំណុចផ្ទះលេខ1A ផ្លូវលេខ១០៣ ក្រុមទី១៤ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ ។
តាមប្រភពព័ត៌មានពីសមត្ថកិច្ចបានឲ្យដឹងថា ជនសង្ស័យដែលត្រូវបានឃាត់ខ្លួនឈ្មោះ ដាវី ភេទស្រី អាយុ៤៣ឆ្នាំ។ ចំណែកជនរងគ្រោះជាម្ចាស់កាបូបឈ្មោះ ថេង ស៊ាងហោ ភេទស្រី អាយុ៣៥ឆ្នាំ ។
ប្រភពដដែលបានបន្តឲ្យដឹងទៀតថា ក្រោយពីឃាត់ខ្លួនស្រី្ដជាជនសង្ស័យខាងលើ សមត្ថកិច្ចដកហូតបានវត្ថុតាង ម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ1AF 4017។ ចំណែកសម្ភារដែលជនសង្ស័យបានលួចទៅមានកាតទូរស័ព្ទមួយចំនួនគិតជាទឹកប្រាក់១៣០០ដុល្លារ(បានបាត់ទាំងស្រុង) និងប្រាក់ចរៀលចំនួន១លានរៀល (រកឃើញនៅនឹងខ្លួនជនសង្ស័យ) ។
ក្រោយពីឃាត់ខ្លួន សមត្ថកិច្ចបានបញ្ជូនជនសង្ស័យទៅកាន់អធិការដ្ឋាននគរបាល ខណ្ឌឫស្សីកែវ ដើម្បីកសាងសំណុំរឿងចាត់ការបន្ដតាមនីតិវិធី៕
ដោយ៖ អារុណរះ
