ភ្នំពេញ ៖ នគរបាលខណ្ឌសែនសុខបានឃាត់ខ្លួនបុរសចំនួន៦នាក់ ជាកងសន្តិសុខយាមក្នុងបុរីមួយ ដែលជាប់ពាក់ព័ន្ឋសង្ស័យ ថា បានព្រួត គ្នាវាយស្រ្តីម្នាក់អោយរងរបួសធ្ងន់ធ្ងរប៉ុនប៉ងសម្លាប់ប្លន់យកទ្រព្យសម្បត្តិ ខណៈដែលនាងកំពុងដេកលក់ នៅក្នុងផ្ទះ។

ហេតុការនេះភ្ញាក់ផ្អើលឡើងកាលពីព្រឹកព្រហាមថ្ងៃទី០១ ខែតុលា ឆ្នាំ ២០១៧ នៅផ្ទះលេខ៣១ ក្រុម១២ ផ្លូវលេខ៦បេតេ ភូមិគោកឃ្លាង សង្កាត់គោកឃ្លាង ខណ្ឌសែនសុខ ។

ប៉ូលិសនិយាយថា ក្រុមជនជាប់សង្ស័យទាំង៦នាក់ខាងលើ១,ឈ្មោះ រ៉ា វិសាល អាយុ១៨ឆ្នាំ។ ២,ឈ្មោះសាបាន ភក្ត្រា អាយុ២៤ឆ្នាំ ៣,ឈ្មោះ តឿ អាយុ២០ឆ្នាំ។ ពួកគេមានមុខរបរជាបុគ្គលិកសន្តិសុខរបស់ក្រុម៤,ឈ្មោះប្រាក់ វាន្នី អាយុ៣៦ឆ្នាំ។ ៥,ឈ្មោះ រស់ វ៉ាន អាយុ២១ឆ្នាំ។ ៦,ឈ្មោះ ធី ថាន អាយុ៣១ឆ្នាំ។

ប៉ូលិសនិយាយជនសង្ស័យខាងលើ ត្រូវបានឃាត់ខ្លួនដោយជាប់សង្ស័យថា មានការពាក់ព័ន្ឋប៉ុនប៉ងធ្វើឃាតមកស្រ្តីពាណិជ្ជករម្នាក់មានទីលំនៅក្នុងបុរី ដែលនាងជាជនរងគ្រោះនៅក្នុងហេតុការណ៍នេះឈ្មោះ គឹម សុផុនវឌ្ឍនា ភេទស្រីអាយុ៣៦ឆ្នាំ
មុខរបរជាពាណិជ្ជករ ស្នាក់នៅផ្ទះខាងលើក្នុងបុរីពិភពថ្មី ជាមួយប្តីនិងកូន២នាក់ អាយុក្រោម៨ឆ្នាំ។

លោក ត្រាង ទី អាយុ៤៨ឆ្នាំ ត្រូវជាប្តីរបស់ជនរងគ្រោះបានឲ្យដឹងថា÷ ប្រពន្ឋរបស់គាត់មិនដែលមានទំនាស់ ជាមួយអ្នកណាឡើយ ហើយមុនពេលកើហេតុ កាលពីវេលាម៉ោង៤ព្រឹកថ្ងៃអាទិត្យទី០១ ខែតុលា គាត់បានភ្ញាក់ពីដំណេក ត្រូវធ្វើដំណើរទៅខេត្តសៀមរាប ដើម្បីទំនាក់ទំនងការងារ ដោយឲ្យជំនួយការបើករថយន្តមកទទួល ជិះចេញពីផ្ទះទៅ ដោយមិនបានចាក់សោទ្វារបន្ទប់គ្រាន់តែដាក់គន្លឹះទ្វាររបងមុខហើយក៏ជិះរថយន្តចាកចេញទៅ លុះដល់វេលាម៉ោង៤និង៣០នាទី ស្រាប់តែកូនស្រីទូរស័ព្ទប្រាប់ថា÷ ម្តាយមានឈាមប្រឡាក់ពេញមុខ ពេញខ្លួនលើពូក ទើបវិលត្រឡប់មកផ្ទះវិញផ្អើលឆោឡោ បន្ទាប់ពីបានឃើញប្រពន្ធ
ស្ថិតក្នុងស្ថានភាពរបួសធ្ងន់ធ្ងរ ក៏ប្រញ៉ាប់ប្រញាល់ដឹកបញ្ជូនទៅគ្លីនិកតាមរថយន្តរបស់ខ្លួនរួចទើបរាយការណ៍មកប្រាប់សមត្ថកិច្ចចុះទៅពិនិត្យមើលជាក់ស្តែង ។

ក្រោយកើតហេតុសមត្ថកិច្ចនគរបាលជំនាញព្រហ្មទណ្ឌរបស់ខណ្ឌនិងក្រុងបានចុះទៅពិនិត្យ កោសល្យវិច័យ រកឃើញសម្ភារៈបន្សល់ទុក នៅកន្លែងលើតហេតុនោះមាន ពិលពាក់ក្បាលសន្តិសុខពិភពថ្មីចំនួន១ ខ្សែក្រវ៉ាត់របស់សន្តិសុខបុរី ពិភពថ្មីចំនួន១ ខាងក្បាលប្រឡាក់សុទ្ធតែឈាម មួកសន្តិសុខចំនួន១ស្បែកជើងផ្ទាត់មួយចំហៀង ហើយក្រោយពីពិនិត្យកោសល្យវិច្ច័យរួច សមត្ថកិច្ចឈានទៅឃាត់ខ្លួនក្រុមសន្តិសុខបុរីពិភពថ្មីចំនួន៦នាក់ យកទៅសាកសួរនៅអធិការដ្ឋានខណ្ឌសែនសុខ ហើយក្នុងចំណោមមនុស្ស៦នាក់ មាន២នាក់ តេស្តទឹកនោម ឃើញផ្ទុកសារធាតុញៀន សមត្ថកិច្ចបន្តស្រាវជ្រាវបន្តទៀត ។

លោក ម៉ក ហុង អធិការនគរបាលខណ្ឌសែនសុខ បានមានប្រសាសន៍ ការឃាត់ខ្លួនក្រុមជនសង្ស័យទាំង៦នាក់ខាងលើនេះ អាចមានការជាប់ពាក់ព័ន្ឋជាជនដៃដល់តែម្នាក់២នាក់ប៉ុណ្ណោះ ហើយលោកកំពុងតែបន្តធ្វើការស្រាវជ្រាវនៅឡើយ ៕ តុង សីហា