ប្រធានាធិបតីអាមេរិក លោកបារ៉ាក់ អូបាម៉ា បានថ្លែងថា កងកម្លាំងប្រដាប់អាវុធអាមេរិកនឹងត្រូវដាក់ពង្រាយនៅក្នុងប្រទេសកាមឺរ៉ុន(Cameroon)ដើម្បីជួយវាយប្រហារប្រឆាំងទៅលើក្រុមឧទ្ទាមអិស្លាមជ្រុលនិយមបូកូហារ៉ាម ។
កងកម្លាំងសរុបមានប្រមាណ៣០០នាក់ត្រូវដាក់ពង្រាយនៅក្នុងតំបន់ដើម្បីធ្វើប្រតិបត្តិការស៊ើបការណ៍, វាយប្រហារពីលើដែនអាកាស និងប្រតិបត្តិការឈ្លបយកការណ៍នៅក្នុងតំបន់ ។
ប្រទេសកាមឺរ៉ុន និងប្រទេសឆាដ ជាគោលដៅវាយប្រហាររបស់ក្រុមឧទ្ទាមអិស្លាមជ្រុលនិយមផ្តាច់ខ្លួនបូកូហារ៉ាមមកពីភាគខាងជើងប្រទេសនីហ្សេរីយ៉ា ។ លោកបារ៉ាក់ អូបាម៉ា បានថ្លែងថា កងទ័ពទាំងនោះនឹងមានវត្តមានឈរជើងនៅទីប្រទេសកាមឺរ៉ុនរហូតទាល់តែក្នុងតំបន់នោះលែងត្រូវការ ។
នៅក្នុងសេចក្តីជូនដំណឹងមួយទៅកាន់សភា លោកអូបាម៉ាបានសរសេរថា កងទ័ព៩០នាក់ត្រូវបញ្ជូនឲ្យទៅមុនរួចហើយកាលពីថ្ងៃចន្ទ ទី១២ ខែតុលា ឆ្នាំ២០១៥ ។ កងទ័ពទាំងនោះត្រូវបំពាក់អាវុធបរិក្ខាគ្រប់គ្រាន់ដើម្បីការពារសន្តិសុខ និងសុវត្ថិភាពផ្ទាល់ខ្លួន ។
អ្នកនាំពាក្យរបស់សេតវិមាន លោក Josh Earnest បានថ្លែងថា បេសកកម្មនេះជាផ្នែកមួយជួយដល់ការខិតខំប្រឹងប្រែងរបស់កម្លាំងនៅក្នុងតំបន់ដើម្បីបញ្ឈប់ការវាតទីរបស់ក្រុមបូកូហារ៉ាម ក៏ដូចជាក្រុមអង្គការផ្តាច់ខ្លួនបង្កហិង្សាដទៃផ្សេងទៀតស្ថិតនៅតំបន់អាហ្វ្រិកភាគខាងលិចនោះផងដែរ ។
យន្តហោះឈ្លបយកការណ៍ និងកងកម្លាំងអាមេរិកបានចូលរួមក្នុងប្រតិបត្តិការស្វែងរកក្មេងស្រីសិស្សសាលា Chibok ស្ថិតនៅភាគឦសានប្រទេសនីហ្សេរីយ៉ាដែលត្រូវចាប់ជាចំណាប់ខ្មាំងកាលពីឆ្នាំកន្លងមកនោះ ។ ប៉ុន្តែនេះជាពេលវេលាដំបូងគេបំផុតដែលអាមេរិកសម្រេចដាក់ពង្រាយកងកម្លាំងរបស់ខ្លួនក្នុងប្រតិបត្តិការសម្រាប់ជាពេលអនាគតដើម្បីចូលរួមវាយប្រហារណាមួយទៅលើក្រុមបូកូហារ៉ាម ។
ប្រទេសកាមឺរ៉ុនបានក្លាយជាគោលដៅវាយប្រហារពីក្រុមឧទ្ទាមបូកូហារ៉ាម បន្ទាប់ពីប្រទេសនេះបានគាំទ្រនីហ្សេរីយ៉ាក្នុងប្រតិបត្តិការយោធាប្រឆាំងទៅលើក្រុមគេមកនោះ ។ កាលពីថ្ងៃអាទិត្យ ទី១១ ខែតុលា ឆ្នាំ២០១៥កន្លងទៅនេះ ស្ត្រីបំផ្ទុះគ្រាប់បែកអត្តឃាត២នាក់បានធ្វើសកម្មភាពបំផ្ទុះគ្រាប់បែកនៅក្នុងទីប្រជុំជន Kangaleri ភាគខាងជើងរបស់ប្រទេសកាមឺរ៉ុនបណ្តាលឲ្យស្លាប់មនុស្ស៩នាក់ និង២៩នាក់ផ្សេងទៀតរងរបួស ។ ក្រុមបូកូហារ៉ាមត្រូវគេកត់សម្គាល់ថា ជាអ្នកនៅពីក្រោយការវាយប្រហារខាងលើនេះ ៕
ប្រែសម្រួល៖ ថាច់ យ៉ាត
