ភ្នំពេញ៖ យុវជនម្នាក់មិនទាន់ស្វាងស្រាបានបើករថយន្តមួយគ្រឿងទៅបុកចំពីមុខរថយន្តមួយគ្រឿងបណ្តាលឲ្យខូចខាតទាំងសងខាងយ៉ាងដំណំបង្កឲ្យភ្ញាក់ផ្អេីលដល់សមត្ថកិច្ចចុះមកអន្តរាគមន៍ទាំងព្រឹក ។

ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង០៥និង៣០នាទីព្រឹកព្រលឹម ថ្ងៃទី១៦ ខែតុលា ឆ្នាំ២០១៥ នៅតាមបណ្តោយផ្លូវ២៨៩ ស្ថិតក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ ។

តាមសំដីសាក្សីដែលបានឃើញហេតុការណ៍នោះឲ្យបានដឹងថានៅមុនពេលកើតហេតុគេឃើញរថយន្តពីរគ្រឿងបើកបរដោយទិសដៅបញ្ច្រាស់គ្នា ដោយរថយន្តCamryហើម ពណ៍ខ្មៅ ពាក់ស្លាកលេខភ្នំពេញ 2H-8350 បើកបរពីស្តុបស្ពានអាកាសតិចណូមកដល់ចំណុចកើតហេតុទំនងជាឃើញរថយន្តមួយគ្រឿងទៀតបើកបរក្នុងស្ថានភាពស្រវឹងរេពេញផ្លូវទើបម្ចាស់រថយន្តCamryហើម ជាន់ហ្វ្រាំងឈប់កណ្តាលផ្លូវតែម្តង នៅពេលនោះស្រាប់តែរថយន្តCamry  Hybrid  សេរី២០០៧ ពណ៍ស ពាក់ស្លាក ភ្នំពេញ 2X-5165 បើកបរយ៉ាងលឿនហើយរេពេញផ្លូវនោះក៏ជ្រុលមកបុកចំពីមុខយ៉ាងពេញទំហឹងបណ្តាលឲ្យរថយន្តទាំងសងខាងខូចខាតយ៉ាងដំណំ ។ តែមិនបណ្តាលឲ្យមានអ្នកគ្រោះថ្នាក់ដល់អាយុជីវិតនោះទេ ។

សមត្ថកិច្ចបានប្រាប់ឲ្យដឹងថា បុរសដែលបើករថយន្តCamryហើម មានឈ្មោះ ខៀវ ភក្តី អាយុជាង៤០ឆ្នាំ និងយុវជនដែលបើកបររថយន្តបង្កមិនប្រាប់ឈ្មោះដល់សមត្ថកិច្ចបានស្គាល់ឡើយ ។

សមត្ថកិច្ចបានបន្ថែមថាករណីគ្រោះថ្នាក់ចរាចរណ៍នេះខាងភាគីម្ចាស់រថយន្តបង្កម៉ាកCamry Hybrid សុខចិត្តសងសំណងចំនួន៥០០ដុល្លា ដើម្បីបញ្ចប់រឿង ៕

ដោយ៖ ស ដារ៉ា