ភ្នំពេញ៖ ហេតុការណ៍គ្រោះថ្នាក់ចរាចរណ៍មួយបង្កឡើងដោយសារតែបុរសម្នាក់ស្រវឹងស្រាបានបើករថយន្តកាមរីបាឡែនក្នុងល្បឿនលឿនជ្រុលបុករះរនាំងដែកពុះចែកទ្រូងផ្លូវបណ្តាលអោយបាក់អស់ចំនួន១២ផ្ទាំងរៀបស្មើរដល់ដី ហើយរថយន្តបង្កនៅមិនទាន់អស់ល្បឿនក៏ជ្រុលទៅបុកនិងរថយន្ត២គ្រឿងទៀតដែលចតស្ងាមបណ្តាលអោយរងការខូចខាត ។

ហេតុការណ៍នេះបានកើតឡើងកាលពីវេលាម៉ោង៤ទាបភ្លឺថ្ងៃទី១៦ ខែតុលា ឆ្នាំ២០១៥ នៅចំណុចសណ្ឋាគារម៉ានអ៊ី តាមបណ្តោយផ្លូវព្រះមុនីវង្ស ស្ថិតក្នុងសង្កាត់ជ័យជំនះ ខណ្ឌដូនពេញ ហើយបានឆ្លងចូល សង្កាត់វាល់វង្ស ខណ្ឌ៧មករា ។

បើតាមប្រភពព័ត៍មានសាក្សីនៅកន្លែងកើតហេតុបានអោយដឹងថា មុនពេលកើតហេតុគេបានឃើញបុរសម្នាក់បើករថយន្តម៉ាកកាមរីបាឡែន ពណ៍ទឹកប្រាក់ ពាក់ស្លាកលេខភ្នំពេញ2E-1318 ធ្វើដំណើរតាមបណ្តោយផ្លូវព្រះមុនីវង្ស ក្នុងទិសដៅពីត្បូងទៅជើងក្នុងល្បឿនលឿនខណៈមកដល់ចំណុចកើតហេតុបានរេចង្កូតទៅបុករះនឹងរនាំងដែកពុះចែកទ្រួងផ្លូវបណ្តាលអោយបាក់អស់ចំនួន១២ផ្ទាំង រៀបស្មើរដល់ដីហើយរថយន្តបង្កនៅមិនទាន់អស់ល្បឿនក៏ជ្រុលចង្កូតទៅបុករថយន្ត២គ្រឿងទៀតដែលម្ចាស់ចតស្ងៀមនៅចញ្ចើមផ្លូវរងការខូចខាត ។

សាក្សីដដែលបានបន្តថា បន្ទាប់ពីបង្កហេតុរួចម្ចាស់រថយន្តបង្កបានចុះពីលើរថយន្តហើយគេចខ្លួនបាត់ស្រមោលដោយបន្សល់ទុករថយន្តនៅកន្លែងកើតហេតុ ។

ក្រោយពេលកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុនិងសហការជាមួយជុំនាញស្ទូចរថយន្តទៅរក្សាទុកនៅការិយាល័យចរាចរណ៍ជើងគោកដើម្បីរងចាំម្ចាស់ចូលខ្លួនមកដោះស្រាយ ៕

ដោយ៖ ស រស្មី