ភ្នំពេញ៖ ជនសង្ស័យ២នាក់ក្នុងចំណោមបក្ខពួក៦នាក់ ត្រូវនគរបាលខណ្ឌទួលគោកឃាត់ខ្លួនបានក្រោយធ្វើសកម្មភាពកាប់ប្លន់តែមិនបានសម្រេចព្រោះជនរងគ្រោះស្រែកឆោរឡោរបង្កការភ្ញាក់ផ្អើលដល់សមត្ថកិច្ចកំពុងល្បាតក្បែរកន្លែងកើតហេតុចេញអន្តរាគមន៍ភ្លាមៗ ។

ករណីខាងលេីនេះ បានកើតឡើងនៅវេលាម៉ោង០១និង៣០នាទីរំលងអាធ្រាត្រឈានចូលថ្ងៃទី១៦ ខែតុលា ឆ្នាំ២០១៥ នៅចំណុច ក្បែរស្ពានអាកាសតិចណូ ផ្លូវ១១០(មហាវិថីសហព័ន្ធរូស្សី)ក្រុម៥៤ ភូមិ១៤ សង្កាត់ទឹកល្អក់១ ខណ្ឌទួលគោក ។

តាមប្រភពព័ត៌មានពីសមត្ថកិច្ចមូលដ្ឋានបានប្រាប់ឲ្យដឹងថា មុនពេលកើតហេតុជនរងគ្រោះបានជិះម៉ូតូមកយកប្រពន្ធដែលធ្វើការនៅខារ៉ាអូខេទន្លេសេកុងតែនៅពេលជិះមកដល់ក្បែរស្ពានអាកាសតិចណូស្រាប់តែមានជនសង្ស័យ៦នាក់ជិះម៉ូតូចំនួនបីគ្រឿងមកក្បែរហើយកៀរឲ្យជនរងគ្រោះឈប់ហើយក៏ធ្វើសកម្មភាពកាប់ត្រូវកុងទ័រម៉ូតូបណ្តាលឲ្យបែកនិងត្រូវដៃបន្តិចហើយរងគ្រោះក៌ស្រែកឆោរឡោរឡើងបង្កការភ្ញាក់ផ្អើលដល់សមត្ថកិច្ចនគរបាលខណ្ឌទួលគោកដែលកំពុងល្បាតនៅក្បែរនោះឃើញក្រុមជនសង្ស័យទាំងនោះក៏បានជិះម៉ូតូដេញតាមយ៉ាងប្រផាប់ចាប់ប្រផីងមកដល់ក្បែរអធិការដ្ឋាននគរបាលខណ្ឌទួលគោកចាស់ ទើបធ្វើការឃាត់ខ្លួនបានចំនួន២នាក់រួមនិងម៉ូតូ១គ្រឿងម៉ាកនិក ពណ៍ក្រហម ពាក់ស្លាកលេខ ភ្នំពេញ 1CA-2287  ចំណែកបក្ខពួកដែលសេសសល់បានរត់គេចខ្លួនបាត់អស់ ។

សមត្ថកិច្ចបានបន្តទៀតថា ជនរងគ្រោះមានឈ្មោះ សន សូត្រ ភេទប្រុស អាយុ៣១ឆ្នាំ មុខរបរត់ម៉ូតូឌុប ស្នាក់ផ្ទះ១៦ ផ្លូវលំ សង្កាត់ត្រពាំងក្រសាំង ខណ្ឌពោធិសែនជ័យ ។ បច្ចុប្បន្នជនសង្ស័យឃាត់ខ្លួននៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿងចាត់ការបន្ត ៕

ដោយ៖ ស ដារ៉ា