ខេត្តកណ្តាល ៖ បន្ទាប់ពីទទួលបានព័ត៌មានភ្លាម កម្លាំងផ្នែកប្រឆាំងគ្រឿងញៀនបានចុះឃាត់ជនសង្ស័យម្នាក់ និង​ម្នាក់ទៀតបានរត់គេចខ្លួនបាត់ ខណៈកំពុងធ្វើសកម្មភាពជួញដូរថ្នាំញៀន នៅចំណុចស្ពានព្រែកតាមាក់  ស្ថិត ក្នុងភូមិព្រែកតាមាក់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល កាលពីវេលាម៉ោង១២ ថ្ងៃទី៧ ខែតុលា ឆ្នាំ២០១៧ ។

សមត្ថកិច្ចបានឲ្យដឹងថា ជនសង្ស័យទាំង២នាក់ ១-ឈ្មោះ សម្បត្តិ រ៉ាយ ភេទប្រុស អាយុ២៦ឆ្នាំ  មុខរបរកម្មករ​ឡឥដ្ឋ ជនជាតិខ្មែរ មានទីលំនៅភូមិបឹងជន្លេន ឃុំព្រែកអញ្ចាញ ស្រុកមុខកំពូល ខេត្តកណ្តាល (ឃាត់ខ្លួនបាន) និង២-មិនស្គាល់អត្តសញ្ញាណ បានរត់គេចខ្លួនបាត់ ។

វត្ថុតាងចាប់យកមាន ៖ ម៉្សៅក្រាមពណ៌សថ្លាសង្ស័យជាសារធាតុញៀន ចំនួន១កញ្ចប់តូច ,ទូរស័ព្ទម៉ាកណូគា ស៊េរី១២៨០ ចំនួន១គ្រឿង ។

ថ្ងៃកើតហេតុ សមត្ថកិច្ចបានទទួលព័ត៌មានពីករណីខាងលើ កម្លាំងផ្នែកប្រឆាំងគ្រឿងញៀន បានចុះទៅដល់ កន្លែងកើតហេតុ ឃើញជនសង្ស័យកំពុងធ្វើសកម្មភាពលក់ថ្នាំញៀន ។ ភ្លាមនោះសមត្ថកិច្ចនគរបាល ក៏ឃាត់ខ្លួនជនសង្ស័យបានម្នាក់ រួមជាមួយវត្ថុតាងជាក់ស្តែង  បញ្ជូនមកអធិការដ្ឋាននគរបាលស្រុកបន្តអនុវត្ត តាមនីតិវិធី ។ ចំណែកជនសង្ស័យម្នាក់ទៀតបានជិះម៉ូតូរត់គេចខ្លួនបាត់ ។

ក្រោយធ្វើការសាកសួរ ជនសង្ស័យបានសារភាពថា ខ្លួនបានទិញថ្នាំញៀនពីឈ្មោះ រ៉ា ភេទប្រុស រស់នៅទីក្រុង ភ្នំពេញ  ៕ ស្អាងជ័យ