ខេត្តកណ្តាល៖ បុរសម្នាក់បានរងរបួសយ៉ាងធ្ងន់ធ្ងរត្រូវបានរថយន្តសាមុយប្រចាំស្នងការដ្ឋាននគរបាលខេត្តកណ្តាលដឹកបញ្ជូនទៅសង្រ្គោះនៅគ្លីនិកឯកជនកែវសានក្រុងតាខ្មៅ បន្ទាប់ពីជនរងគ្រោះត្រូវរថយន្តវីហ្គោបើកបរដោយជនមិនស្គាល់អត្តសញ្ញាណបើកបុកចំពីក្រោយ ខណៈកំពុងជិះម៉ូតូម្នាក់ឯងតាមដងផ្លូវសាធារណៈ ។
ករណីគ្រោះថ្នាក់ចរាចរណ៍ខាងលើនេះបានកើតឡើង កាលពីវេលាម៉ោង១៨ និង១០នាទី ថ្ងៃទី១៥ ខែតុលា ឆ្នាំ២០១៥ នៅលើកំណាត់ផ្លូវលេខ១១៥ ត្រង់ចំណុចខាងមុខច្រកចូលផ្ទះសំណាក់រស្មីស្រែមាស ស្ថិតក្នុងភូមិខ្ពបវែង សង្កាត់កំពង់សំណាញ់ ក្រុងតាខ្មៅ ។
មន្ត្រីនគរបាលចរាចរណ៍ក្រុងតាខ្មៅបានឲ្យដឹងថា រថយន្តបង្កម៉ាកតូយូតាហាយឡាក់វីហ្គោ ពណ៌ទឹកប្រាក់ ពាក់ស្លាកលេខAT15 2-0567 បើកបរដោយជនមិនស្គាល់អត្តសញ្ញាណ ក្រោយពីកើតហេតុបានគេចខ្លួនបាត់ ។ ចំណែកឯជនរងគ្រោះឈ្មោះ ច័ន្ទ រស្មីដេត ភេទប្រុស អាយុ៣២ឆ្នាំ មានទីលំនៅក្នុងភូមិខ្ពបវែង សង្កាត់កំពង់សំណាញ់ ក្រុងតាខ្មៅ ជិះម៉ូតូម៉ាកហុងដាគុបជ្រុង ធុនសេ៧០ ពណ៌ទឹកប៊ិច ពាក់ស្លាកលេខ01-4003 ។
ប្រភពដដែលបានបន្តថា នៅមុនពេលកើតហេតុសាក្សីបានឃើញជនរងគ្រោះជិះម៉ូតូម្នាក់ឯងតាមបណ្តោយផ្លូវលេខ១១៥ ក្នុងទិសដៅកើតទៅលិច ដោយបានពាក់មួកការពារសុវត្ថិភាពនិងបំពាក់កញ្ចក់មើលក្រោយត្រឹមត្រូវ ខណៈបើកដល់ចំណុចកើតហេតុក៏ត្រូវរថយន្តបង្កបើកបរមកតាមក្រោយបុកចំពេញទំហឹង បណ្តាលឲ្យម៉ូតូនិងជនរងគ្រោះដួលបោកទៅលើផ្លូវរងរបួសយ៉ាងធ្ងន់ធ្ងរ រីឯម៉ូតូនិងរថយន្តខូចខាតយ៉ាងដំណំផងដែរ ។
ក្រោយពីមានហេតុការណ៍កើតឡើងជនរងគ្រោះ ត្រូវបានរថយន្តសាមុយប្រចាំស្នងការដ្ឋាននគរបាលខេត្តកណ្តាល ដឹកបញ្ជូនទៅសង្រ្គោះនៅគ្លីនិកឯកជនកែវសានក្រុងតាខ្មៅ ។ ដោយឡែករថយន្តនិងម៉ូតូ ត្រូវបាននគរបាលជំនាញចរាចរណ៍ក្រុងតាខ្មៅធ្វើកំណត់ហេតុវាស់វែងដកហូតយកទៅរក្សាទូកនៅអធិការដ្ឋាន ដើម្បីចាត់ការតាមច្បាប់ ៕
ដោយ៖ ស្អាងជ័យ
