ខេត្តកំពង់ធំ៖ កាលពីថ្ងៃ១៦ ខែតុលា ឆ្នាំ២០១៥ លោក នាយឧត្តមសេនីយ៌ គន់ គីម អគ្គលេខាធិការសមាគមអតីតយុទ្ធជនកម្ពុជា និងលោក អ៊ុត សំអន គណៈអភិបាលខេត្តកំពង់ធំ បានអញ្ជើញជាអធិបតីភាពក្នុងពិធីប្រគល់ថវិកាបេឡាមរណៈសង្គ្រោះដល់សពសមាជិកអតីតយុទ្ធជនខេត្តកំពង់ធំសរុបចំនួន៤០នាក់ ។
ការប្រគល់ថវិកាបេឡាមរណៈសង្គ្រោះដល់សពសមាជិកអតីតយុទ្ធជននេះ ត្រូវគេឃើញថាបានធ្វើជាបន្តបន្ទាប់នៅតាមរាជធានី ខេត្ត ក្នុងព្រះរាជាណាចក្រកម្ពុជា បន្ទាប់ពីអង្គមហាសន្និបាតសមាគមអតីតយុទ្ធជន កាលពីថ្ងៃទី២កញ្ញា២០១៥ បានដាក់ចេញទិសដៅភារកិច្ចថ្មី ក្នុងនោះថវិកាដែលសម្តេចតេជោ ហ៊ុន សែន បានប្រកាសផ្តល់ជូនគ្រួសារសពសមាជិកសមាគមអតីតយុទ្ធជនចំនួន១.៥២៣នាក់ដែលនៅជំពាក់ មកដល់ពេលនេះបានប្រគល់ជិតចប់សព្វគ្រប់ហើយ ។
មានប្រសាសន៏នាឱកាសនោះ លោក នាយឧត្តមសេនីយ៌ គន់ គីម បានពាំនាំនូវការផ្តាំផ្ញើសួរសុខទុក្ខពីសម្តេចតេជោហ៊ុនសែន និង សម្តេចកិត្តិព្រឹទ្ធបណ្ឌិត ជូនដល់ក្រុមគ្រួសារអតីតយុទ្ធជន និវត្តជន ទាំងអស់ដែលមានគុណបំណាច់ចំពោះជាតិ។លោកនាយឧត្តមសេនីយ៏ គន់ គីម បានជម្រុញឲ្យសមាគមអតីតយុទ្ធជនខេត្តកំពង់ធំ ត្រូវបន្តខិតខំបំពេញការងារឲ្យល្អប្រសើរថែមទៀត ជាពិសេសត្រូវមានកិច្ចសហការល្អជាមួយស្ថាប័នពាក់ព័ន្ធ អង្គការដៃគូរនានា ដើម្បីបម្រើផលប្រយោជន៏អតីតយុទ្ធជន និងនិវត្តជន ។
នាឱកាសនោះ បន្ទាប់ពីបញ្ចប់មតិសំណេះសំណាលលោកនាយឧត្តមសេនីយ៌ គន់ គីម ក្នុងនាមសម្តេចតេជោ ហ៊ុន សែន បានឧបត្ថម្ភថវិកា ដើម្បីផ្តល់ជូនគ្រួសារសពសមាជិកសមាគមអតីតយុទ្ធជនចំនួន៤០នាក់ ដោយក្នុងម្នាក់ៗទទួលបានថវិកា៤លានរៀល ឧបត្ថម្ភដល់សមាជិកចូលរួមក្នុងអង្គពិធី មាន៖យោធិនពិការ គ្រួសារមរណៈ យោធិនចូលនិវត្តន៏ សរុប១០០នាក់ ម្នាក់ៗទទួលបានថវិកា៥ម៉ឺនរៀល ៕
