ខេត្តក្រចេះ៖ ជនសង្ស័យចំនួន២នាក់ ត្រូវបានកម្លាំងនគរបាលក្រុងក្រចេះ សហការណ៍ជាមួយកម្លាំងនគរបាលខេត្ត ប្រដេញស្ទាក់ចាប់បាន ក្រោយពីពួកគេបានធ្វើសកម្មភាពលួចម៉ូតូរបស់ប្រជាពលរដ្ឋបានរយៈពេលជាង២ម៉ោងរួចមក ។ ក្រោយពីចាប់ឃាត់ខ្លួនសមត្ថកិច្ចបានឆែកឆែររកឃើញថ្នាំញៀនមួយចំនួនធំ ដែលពួកគេលាក់ទុកនៅក្នុងពួកម៉ូតូមួយគ្រឿងទៀត ដែលពួកគេជិះធ្វើសកម្មភាព។
ប្រត្តិបត្តការប្រដេញស្ទាក់ចាប់មុខសញ្ញា ចោរលួចម៉ូតូនេះ គឺបានធ្វើឡើង នៅរសៀលថ្ងៃទី១៦ខែតុលានេះ នៅចំនុចក្នុងព្រៃប្រលានយន្តហោះ ក្នុងសង្កាត់អូរឬស្សី ក្រុងក្រចេះ ក្រោយពីពួកគេបានធ្វើសកម្មភាពលួចម៉ូតូស្កូបពីមួយគ្រឿង របស់ពលរដ្ឋរស់នៅសង្កាត់ក្រគរ ក្រុងក្រចេះ ។
ជនសង្ស័យទាំងពីរនាក់នេះ ម្នាក់ឈ្មោះ សេង គឹមសំ រស់នៅសង្កាត់រកាកណ្តាល ក្រុងក្រចេះ និងម្នាក់ទៀតឈ្មោះ ប្រុស រស់នៅភូមិវត្ត សង្កាត់ក្រចេះ ក្រុងក្រចេះ ហើយជនទាំងពីនាក់នេះគឺជាមុខសញ្ញាលួចម៉ូតូ និងមុខសញ្ញាជួញដូរថ្នាំញៀន។
នគរបាលក្រុងក្រចេះបាននិយាយថា ក្នុងសកម្មភាពប្រដេញស្ទាក់ចាប់មុខសញ្ញាចោរលួចម៉ូតូទាំង២នាក់នេះ គឺនគរបាលបានប្រើពេលជាង២ម៉ោង និងកម្លាំងនគរបាលក្រុងក្រចេះ ប្រមាណជាង២០នាក់ ក្នុងការប្រដេញស្ទាក់ចាប់។
នគរបានបានបន្តថា ក្នុងសកម្មភាពលួចម៉ូតូស្កូបពី១គ្រឿងនេះ គឺឈ្មោះ សេង គឹមសំ ជាអ្នកចូលលួច ហើយជននេះបានជិះរត់គិចសំដៅចូលទៅតាមផ្លូវប្រលានយន្តហោះ តែដោយសារមានការប្រដេញស្ទាក់ចាប់ពីកម្លាំងសមត្ថកិច្ច ជនសង្ស័យបានផ្តួលម៉ូតូចោលនៅក្នុងព្រៃវាលស្រែហើយរត់គេច។ ខណៈនោះមានបក្សពួកគេម្នាក់ទៀត ឈ្មោះ ប្រុស បានជិះម៉ូតូមួយគ្រឿងម៉ាក ហ្វីណូ គ្មានស្លាកលេខ មកឌុបជននេះដើម្បីរត់គិច ពីការតាមស្ទាក់ចាប់របស់កម្លាំងសមត្ថកិច្ច ។ តែទោះយ៉ាងណាជនទាំងពីនាក់នេះ ត្រូវបានសមត្ថកិច្ចចាប់ក្រសោបបានទាំងពីរនាក់ នៅក្នុងព្រៃក្បែរនិងបន្ទាយយោធាខេត្ត ខណៈនោះសមត្ថកិច្ចបានឆែកឆែររកឃើញថ្នាំញៀនមួយចំនួនធំ ដែលលាក់ទុកនៅក្រោមពួកម៉ូតូ ហ្វីណូ ដែលពួកគេរតើគិចនេះ។
យ៉ាងណាក៏ដោយ ករណីកាច់សោរ ក នៅក្នុងក្រុងក្រចេះ នៅថ្ងៃទី១៦ខែតុលានេះ គឺមានចំនួន២ ករណី ករណីទី១ គឺក្រុមចោរ បានធ្វើសកម្មភាព លួចកាច់សោរ ក ម៉ូតូ១គ្រឿង ម៉ាកវ៉េវអាល់ហ្វាល នៅក្នុងសង្កាត់អូរឬស្សីក្រុងក្រចេះ ហើយជិះរត់គិចខ្លួនដោយសុវត្ថិភាព ។ និងមួយករណីទៀត គឺក្រុមចោរបានធ្វើសកម្មភាពលួចម៉ូតូស្កូបពី១គ្រឿងនៅក្នុងសង្កាត់ក្រគរ ក្រុងក្រចេះ តែត្រូវសមត្ថកិច្ចប្រដេញស្ទាប់បាន ក្រោយពីធ្វើសកម្មភាពបានជាងពីម៉ោងរួចមក ៕
ដោយ៖ កោះទ្រុង
