ខេត្តកណ្តាល៖ សមត្ថកិច្ចនគរបាលស្រុកកោះធំបើកប្រតិបត្តិការបង្ក្រាបបទល្មើសគ្រឿងញៀន២ករណីផ្សេងគ្នា ឃាត់ខ្លួនជនសង្ស័យ២នាក់ ដកហូតបានថ្នាំញៀន០២កញ្ចប់តូច និងសម្ភារៈពាក់ព័ន្ធមួយចំនួនទៀត នៅថ្ងៃទី២១ ខែតុលា ឆ្នាំ២០១៥ ដើម្បីកសាងសំណុំរឿងចាត់ការតាមច្បាប់ ។
អធិការនគរបាលស្រុកកោះធំលោកវរសេនីយ៍ ឆឿន ប៊ុនឆន បានឲ្យដឹងថា ជនសង្ស័យទី ១ ឈ្មោះ សុង ម៉ុងហេង ភេទប្រុស អាយុ៣០ឆ្នាំ មុខរបរជាអ្នកបើកបររថយន្ត មានទីលំនៅក្នុងភូមិស្វាយជួរ ឃុំកោះខែល ស្រុកស្អាង ខេត្តកណ្តាល ត្រូវបានសមត្ថកិច្ចចាប់ខ្លួនកាលពីវេលាម៉ោង៨ និង១៥នាទីព្រឹក ថ្ងៃទី២១ ខែតុលា ឆ្នាំ២០១៥ នៅត្រង់ចំណុចចម្ការល្មុត ស្ថិតក្នុងភូមិព្រែកបិ ឃុំកោះធំ(ខ) ស្រុកកោះធំ។ ជនសង្ស័យទី២-ឈ្មោះ ថាត ថេត ភេទប្រុស អាយុ២៣ឆ្នាំ ជនជាតិខ្មែរ មុខរបរ ជាជាងក្រឡឹងមានទីលំនៅក្នុងភូមិព្រែកតាមេម ឃុំព្រែកស្តី ស្រុកកោះធំ ត្រូវបានសមត្ថកិច្ចចាប់ខ្លួន កាលពីវេលាម៉ោង១២ និង៤០នាទី ថ្ងៃទី២១ ខែតុលា ឆ្នាំ២០១៥ នៅព្រែកតាមេម ឃុំព្រែកស្តី ស្រុកកោះធំ ។
លោកវរសេនីយ៍ ឆឿន ប៊ុនឆន បន្តថា ប្រតិបត្តិការបង្ក្រាបទី១- ដកហូតបានម្សៅក្រាម ពណ៌សថ្លា សង្ស័យជាថ្នាំញៀនប្រភេទមេតំហ្វេតាមីនចំនួន០១កញ្ចប់តូច ,ឧបករណ៍សម្រាប់សេពគ្រឿងញៀនមួយចំនួន ,ទូរស័ព្ទដៃ០១គ្រឿង ,កាបូបដាក់លុយចំនួន០១មានលុយចំនួន៦៥៥០០រៀល និងម៉ូតូមួយគ្រឿងម៉ាកហុងដាស្គុបពី ។ ប្រតិបត្តិការទី២- ដកហូតបានម្សៅក្រាម ពណ៌សថ្លា សង្ស័យជាថ្នាំញៀនមេតំហ្វេតាមីន ចំនួន០១កញ្ចប់តូច ,ឧបករណ៍សម្រាប់សេពគ្រឿងញៀនមួយចំនួន ,ទូរស័ព្ទដៃ០១គ្រឿង និងម៉ូតូមួយគ្រឿងម៉ាកហុងដាវ៉េវ ។
លោកអធិការបញ្ជាក់ថា ជនសង្ស័យទាំង២នាក់ខាងលើនេះជាមុខសញ្ញាដែលកម្លាំងប៉ូលិសកំណត់ និងតាមដាន ។ នៅមុនពេលចាប់ខ្លួនសមត្ថកិច្ចបានទទួលព័ត៌មានថា ជនសង្ស័យកំពុងរក្សាទុកគ្រឿងញៀននៅជាប់ខ្លួន ទើបសមត្ថកិច្ចប៉ូលិសព្រហ្មទណ្ឌស្រុកសហការជាមួយប៉ូលិសមូលដ្ឋានតាមប្រមាញ់ចាប់ខ្លួនបានជនសង្ស័យជាបន្តបន្ទាប់ រួមជាមួយវត្ថុតាងជាក់ស្តែងដើម្បីចាត់ការតាមច្បាប់ ៕
ដោយ៖ ស្អាងជ័យ
