ខេត្ដសៀមរាប៖ ក្រុមហ៊ុនរថយន្ដដឹក អ្នកដំណើរព្រឹកថ្ងៃទី២១ ខែតុលា ឆ្នាំ២០១៥ បានចាប់ផ្ដើមតវ៉ាខ្លាំងប្រឆាំងទៅនឹងកុងត្រូលជជុះទារប្រាក់នៅក្បែរនឹងបុរីសៀងណាំ ចម្ងាយប្រមាណ៥គីឡូម៉ែត្រពីក្រុង សៀមរាប ដោយពួកគេមិនព្រមចូលបង់ ប្រាក់ ហើយត្រូវបានឃាត់ដោយសន្ដិសុខ ធ្វើឱ្យកកស្ទះចរាចរណ៍ ។
ក្រុមរថយន្ដដឹកអ្នកដំណើរដែលតវ៉ា ប្រឆាំងមានក្រុមហ៊ុនរថយន្ដដឹកអ្នក ដំណើរឡារីតាបានបញ្ជូនរថយន្ដរបស់ខ្លួនប្រមាណ១០គ្រឿងមកតម្រៀបគ្នាបណ្ដាលឱ្យកកស្ទះចរាចរណ៍យ៉ាងខ្លាំង ហើយ បានជំរុញឱ្យលោកអភិបាលក្រុងសៀម រាបចុះមកអន្ដរាគមន៍ទើបសភាពការណ៍ធូរស្រាលវិញ ។
លោក ស៊ុន ស៊ីម តំណាងក្រុមហ៊ុន ឡារីតាបាននិយាយថា កន្លងមកមាន សន្ដិសុខមួយក្រុមតែងតែយកលុយនៅ កន្លែងបង់ចំណតនិងមានមួយក្រុមទៀតបានទៅដើរប្រមូលយកលុយពីក្រុមហ៊ុន និងតែងតែដូរមុខមនុស្សរហូត ។ ប្រការ នេះបានធ្វើឱ្យក្រុមហ៊ុនទាំងអស់ចំនួន៨ បានដាក់សំណើទៅអភិបាលខេត្ដសៀម រាបហើយពួកគេសុទ្ធតែមានបញ្ហាដូច គ្នា ។ លុះនៅថ្ងៃទី២០ ខែតុលា ឆ្នាំ២០១៥ សាលាក្រុងបានកោះប្រជុំក្រុមហ៊ុនរថ យន្ដដឹកអ្នកដំណើរទាំងអស់ ប៉ុន្ដែពុំមាន ដំណោះស្រាយអ្វីឡើយ ។
លោក ស៊ុន ស៊ីម បានបញ្ជាក់ថា ក្រុមហ៊ុនរថយន្ដដឹកអ្នកដំណើរទាំងអស់ គ្រាន់តែចង់បានតារាងតម្លៃមួយឱ្យពិត ប្រាកដដែលចេញពីក្រសួងសេដ្ឋកិច្ច និងហិរញ្ញវត្ថុថាតើពួកគាត់ត្រូវបង់តម្លៃប៉ុន្មានសម្រាប់បង់ថ្លៃចំណត ហើយតើ វិសាលភាពរបស់ម្ចាស់ចំណតមាន ប៉ុនណាតើគ្រប់គ្រងតែចំណតឬក៏គ្រប់ គ្រងទាំងការរត់តាមផ្លូវដែរ? ជាមួយ គ្នានេះរាល់ការទារប្រាក់គឺគួរតែចេញ វិក្កយបត្រឱ្យបានត្រឹមត្រូវផង ។
លោក ស៊ូ បា្លតុង អភិបាលក្រុងសៀម រាបដែលបានចុះទៅអន្ដរាគមន៍បាន មានប្រសាសន៍ថា កាលពីថ្ងៃទី២០ ខែ តុលា ឆ្នាំ២០១៥ ក្រុមហ៊ុនរថយន្ដដឹកអ្នក ដំណើរទាំងអស់ដែលរួមមានក្រុមហ៊ុន រថយន្ដធំៗចំនួន២០ក្រុមហ៊ុន និងរថយន្ដ តូចៗចំនួន៨ក្រុមហ៊ុនត្រូវសាលាក្រុង កោះហៅដើម្បីប្រជុំ និងស្ដាប់ស.ជ.ណ ធ្វើយ៉ាងម៉េចរថយន្ដទាំងអស់ត្រូវចូល ក្នុងចំណតក្នុងបំណងរៀបចំសណ្ដាប់ ធ្នាប់ ។ ដូច្នេះប្រសិនបើក្រុមហ៊ុនមិនអនុ វត្ដតាមទេ លោកអាចនឹងស្នើទៅលោក អភិបាលខេត្ដដើម្បីចាត់វិធានការស្ទូច រថយន្ដល្មើសសេចក្ដី ណែនាំនោះទុក ។
គួររំលឹកថា កាលពីដើមសបា្ដហ៍នេះ ក្រុមហ៊ុនរថយន្ដក្រុងចំនួន៨ រួមមាន ក្រុមហ៊ុន Lar Ryta , ក្រុមហ៊ុន Tero, ក្រុមហ៊ុន Golden Bayon , ក្រុមហ៊ុន VGS, ក្រុមហ៊ុននាគក្រហម , ក្រុមហ៊ុន សូរិយា , ក្រុមហ៊ុន G.Express និងក្រុម ហ៊ុនរិទ្ធិមុនីបានសរសេរលិខិតរួមគ្នាមួយទៅកាន់លោកអភិបាលខេត្ដ ដោយថា មានប៉ុស្ដិ៍ត្រួតពិនិត្យមួយមានទីតាំងក្បែរបុរីសៀងណាំតែងតែស្ទាក់រថយន្ដក្រុង យកប្រាក់ដោយក្នុងមួយគ្រឿងតម្លៃ១ម៉ឺនរៀលមុននឹងអនុញ្ញាតឱ្យឆ្លងកាត់ ។ លិខិត បញ្ជាក់ថា ក្រៅពីបង់ប្រាក់១ម៉ឺនរៀល ហើយក្រុមហ៊ុនខ្លះទៀតត្រូវបង់ប្រាក់ ប្រហែល៧ម៉ឺនរៀលជារៀងរាល់ខែទៅឱ្យ នគរបាលទៀតផង ៕
ដោយ៖ ហេង នរិន្ទ្រ
