ប្រភពព័ត៌មានបានរាយការណ៍ថា មនុស្ស៩នាក់បានបាត់ខ្លួន និង២នាក់ផ្សេងទៀតបានរងរបួស បន្ទាប់ពីហេតុការណ៍ផ្ទុះនៅរោងចក្រមួយកន្លែងស្ថិតនៅភាគខាងកើតប្រទេសចិនកាលពីថ្ងៃទី២១ ខែតុលា ឆ្នាំ២០១៥ ។ នេះជាហេតុការណ៍ផ្ទុះចុងក្រោយគេបំផុតដែលតែងតែកើតមានឡើងក្នុងប្រទេសចិន ។
កាលពីពេលកន្លងទៅថ្មីៗនេះ ហេតុការណ៍ផ្ទុះយ៉ាងខ្លាំងបានកើតឡើងបណ្តាលឲ្យមនុស្ស១៦០នាក់បាត់បង់ជីវិត ស្ថិតនៅភាគខាងជើងទីក្រុងកំពង់ផែ Tianjin ក្នុងខែសីហា ឆ្នាំ២០១៥ ។ ហេតុការណ៍ផ្ទុះនេះធ្វើឲ្យមានការលើកសំណួរអំពីប្រព័ន្ធសុវត្ថិភាពការងារនៅក្នុងប្រទេសនេះ ខណៈដែលសេដ្ឋកិច្ចហាក់គ្មានសន្ទុះទៅមុខនោះ ។
ទីភ្នាក់ងារព័ត៌មានស៊ីនហួបានផ្សព្វផ្សាយថា ហេតុការណ៍ផ្ទុះនាពេលនេះបានកើតឡើងនៅទីតាំងសាជីវកម្មឧហស្សាកម្មគីមី Shandong Tianbao ស្ថិតនៅក្នុងខេត្ត Pingyi ។ ប្រភពបញ្ជាក់ថា រោងចក្រនេះផលិតគ្រឿងផ្ទុះដែលបម្រើឲ្យស៊ីវិល ។ មូលហេតុបណ្តាលឲ្យកើតមានហេតុការណ៍ផ្ទុះកើតឡើងកំពុងស្ថិតនៅក្រោមការស៊ើបអង្កេត ។
ការផ្ទុះរោងចក្រគីមីដែលតែងតែកើតឡើងជាធម្មតានៅក្នុងប្រទេសចិន ហើយច្រើនតែបណ្តាលឲ្យគ្រោះថ្នាក់ដល់ជីវិតមនុស្ស ជាពិសេសហេតុការណ៍ផ្ទុះនៅទីក្រុងកំពង់ផែ Tianjin នោះបានជំរុញឲ្យមានការបិទតំបន់នេះទាំងមូល ដើម្បីឲ្យអាជ្ញាធរត្រួតពិនិត្យពីប្រព័ន្ធសុវត្ថិភាព បន្ទាប់ពីមានការសាយភាយគីមីចេញមកខាងក្រៅ ៕
ប្រែសម្រួល៖ ថាច់ យ៉ាត
