ភ្នំពេញ៖ ក្រោយពីបាត់មុខមួយរយៈស្រាប់តែតារាចម្រៀង ជ័យ សុវ៉ាត ធ្វើឲ្យអ្នកគាំទ្រភ្ញាក់ផ្អើលខ្លាំងនឹងបទចម្រៀងថ្មីនៅផលិតកម្មសាន់ដេ។ នេះគឺជា លើកដំបូងនិងជាបទទីមួយរបស់តារាចម្រៀងវ័យក្មេងរូបនេះដែលចេញនៅផលិតកម្មសាន់ដេ។
បទចម្រៀងថ្មីរបស់លោកត្រូវបានអ្នកគាំទ្រជាច្រើនចែកផ្សាយលើបណ្តាញទំនាក់ទំនងសង្គមហ្វេសប៊ុក។ បទចម្រៀងថ្មីពិរោះរណ្តំចិត្តអ្នកគាំទ្រ គឺបទ”ក្រចេះស្នេហ៍បង” របស់ជ័យ សុវ៉ាត រៀបរាប់អំពីសម្រស់នារីខេត្តក្រចេះត្រូវបានគណនីយហ្វេសប៊ុកផ្លូវការរបស់ផលិតកម្មសាន់ដេបានចេញកាលពីរាត្រីថ្ងៃទី១៥ធ្នូនេះ។ បទចម្រៀងនេះធ្វើឲ្យគេភ្ញាក់ផ្អើលនឹងវត្តមានតារាចំណូលថ្មីរបស់ផលិតកម្មសាន់ដេ ហើយក៏ទទួលបានការសសើរខ្លាំងពីអ្នកគាំទ្រផងដែរ។ វត្តមានអតីតម្ចាស់ជ័យលាភី ផ្កាយរះក្នុងសួនរូបនេះលើទ្រនំថ្មីក៏ក្រោយពេលដែលការចាកចេញរបស់តារាចម្រៀង ខេមរៈ សិរីមន្តពីផលិតកម្មនេះមិនបានប៉ុន្មានខែផង និងក្រោយពីផលិតកម្មនេះសម្រុកផលិតបទចម្រៀងឲ្យតារាលំដាប់ជួរមុខក្នុងផលិតកម្មខ្លួនច្រៀងជាបន្តបន្ទាប់ដែរ។
នៅមិនទាន់ស្វែងរកការបញ្ជាក់បន្ថែមពីតារាចម្រៀងប្រុស លោក ជ័យ សុវ៉ាតបាននៅឡើយទេ។ ប៉ុន្តែការបង្ហាញវត្តមានក្នុងផលិតកម្មថ្មីនេះគឺក្រោយពេលតារាចម្រៀងរូបនេះបញ្ចប់ការច្រៀងក្នុងផលិតកម្មមេហ្គា អស់រយៈពេលជាយូ និងបញ្ចេញបទ Original Song មួយចំនួនកាលពីពេលកន្លងទៅ។ គេនៅទាន់ប្រាកដនៅឡើយទេថាតើសន្ទុះនៃការគាំទ្រតារាចម្រៀងវ័យក្មេងរូបនេះនឹងហក់ឡើងខ្លាំងកម្រិតណា នោះដែរ ប៉ុន្តែ តាមរយៈទឹកដមសំនៀងពិរោះថ្នមរណ្តំចិត្តរបស់តារាចម្រៀងរូបនេះក៏មិនពិបាកនឹងប្រជែងបើកទីផ្សារប៉ុន្មាននោះទេខណៈដែលនៅផលិតកម្មនេះក៏ប្រមូលផ្តុំដោយតារាចម្រៀងល្បីឈ្មោះជាច្រើនផងដែរ៕
ដោយ ៖ វឌ្ឍនា
