បន្ទាប់ពីល្បីល្បាញកម្មវិធី Cambodian Idol ខ្ញុំបាទក៏ចំណាយពេលអង្គុយសំកុកមុខកញ្ចក់ទូរទស្សន៍រង់ចាំមើលកម្មវិធីនេះ ។ ខ្ញុំបាទមិនយល់អ្វីជ្រៅជ្រះអំពីកម្មវិធីនេះទេ ប៉ុន្តែបែរជាចាប់អារម្មណ៍ចំពោះគណៈកម្មការទាំង៤រូប ក៏ដូចជាអ្នកសម្របសម្រួលកម្មវិធី (ពិធីករ) ដែលនិយាយពេញៗមាត់ភាសាអង់គ្លេសនូវពាក្យមួយម៉ាត់ថា vote (វ៉ូត) ដែលមានន័យជាខេមរភាសាថា បោះឆ្នោត ។
Vote ជាភាសាអង់គ្លេស ដែលភាសាខ្មែរមានន័យថា បោះឆ្នោត ។ គណៈកម្មការទាំង៤រូប រួមទាំងអ្នកសម្របសម្រួលកម្មវិធីអាចនិយាយភាសាខ្មែរដែលជាភាសាកំណើតបានយ៉ាងស្ទាត់ជំនាញ ។ ដូច្នេះគាត់ពិតជាដឹងថា អ្វីទៅ Vote ។ នៅក្នុងភាសាខ្មែរសំដៅទៅលើការបោះឆ្នោត ។ បើភាសាខ្មែរមាន ហេតុអ្វីមិនប្រើ? បែរជាប្រើភាសាបរទេសជំនួសទៅវិញ? ឬមួយថា បោះឆ្នោតមិនមានន័យគ្រប់គ្រាន់សម្រាប់កម្មវិធីនេះ ដែលចាំបាច់ត្រូវប្រើពាក្យវ៉ូត ។ ខ្ញុំមិនជាអ្នកចេះដឹងជ្រៅជ្រះភាសាខ្មែរអ្វីទេ ប៉ុន្តែអ្នកចេះដឹងមួយចំនួនថា ភាសាខ្មែរសម្បូរបែប ដូច្នេះមិនចាំបាច់ប្រើភាសាបរទេសនោះទេ ។
មិនមែនជាគំនិតអភិរក្សអ្វីឡើយ ប៉ុន្តែបើពាក្យខ្មែរយើងមានដែរ ហេតុអ្វីមិនប្រើ ចាំបាច់ខ្ចីរបស់គេធ្វើអ្វី? ឬមួយក៏គណៈកម្មការចាំបាច់ត្រូវប្រើពាក្យវ៉ូត ព្រោះវាឡូយ និងវាទាន់សម័យ? អ្វីដែលបានកើតឡើង គឺជាការជាន់ពន្លិចវប្បធម៌ អរិយធម៌ខ្លួនឯង ដោយសារតែក្រុមអ្នកសិល្បៈនេះមែនទេ? ៕
