ភ្នំពេញ ៖ បុរសម្នាក់បានដួលស្លាប់ ខណៈកំពុងអង្គុយលើបង់ថ្ម មុខសួនច្បារ នៅទល់មុខ សាកលវិទ្យាល័យបៀលប្រាយ ធ្វើឲ្យមានការភ្ញាក់ផ្អើលកាលពីវេលាម៉ោង១និង២៥នាទី យប់រំលងអធ្រាត្រ ឈានចូលថ្ងៃទី២៨ ខែមីនា ឆ្នាំ២០១៥ តាមបណ្តោយផ្លូវព្រះសុធារស សង្កាត់ទន្លេបាសាក់ ខណ្ឌចំការមន ។
បើតាមប្រភពព័ត៌មានពីសមត្ថកិច្ចឲ្យដឹងថា បុរសដែលស្លាប់នេះមានឈ្មោះ ឃុច វណ្ណៈ ភេទប្រុស អាយុ២៦ឆ្នាំ ជានិស្សិតនៅសាកលវិទ្យាល័យបៀលប្រាយ ផ្នែកវិទ្យាសាស្ត្រអប់រំ មាន ស្រុកកំណើតនៅ ភូមិអន្លង់មាស ឃុំព្រៃល្វា ស្រុកព្រៃកប្បាស ខេត្តតាកែវ ។
ប្រភពព័ត៌បន្តទៀតថា នៅមុនពេលកើតហេតុបុរសនេះបានអង្គុយលេងនៅលើបង់ថ្ម នៅសួនច្បារខាងលើ តាំងពីវេលាម៉ោង១១យប់ជាងមកម្ល៉េះ ហើយអង្គុយលើបង់តែម្នាក់ឯង មួយសន្ទុះក្រោយមក ស្រាប់តែបុរសនេះបានធ្លាក់ពីលើបង់ថ្មដោយស្មានតែស្រវឹងស្រា ពេលនោះ សមត្ថកិច្ចបានចុះមកត្រួតពិនិត្យនិងហៅបុរសនោះតែបុរសនោះមិនដឹង ខ្លួនទាល់តែសោះ ទើបដឹងថា បុរសនោះបានស្លាប់បាត់ទៅហើយបង្កឲ្យការភ្ញាក់តែម្តង ។
ក្រោយកើតហេតុសមត្ថកិច្ចបានរថយន្តសាមុយរបស់មន្ទីរពេទ្យ មិត្តភាពខ្មែរ-សូវៀតដឹកសព ជនរងគ្រោះយកទៅតម្កល់ទុកនៅមន្ទីរពេទ្យដើម្បីរង់ចាំសាច់ញាតិ ទំនាក់ទំនងមកទទួលយកទៅធ្វើ បុណ្យតាមប្រពៃណី ៕
