ខេត្តបាត់ដំបង៖ សមត្ថកិច្ចគយប្រចាំមាត់ច្រកដំបន់ភ្នំដីស្រុកសំពៅលូន ខេត្តបាត់ដំបង បានធ្វើការឃាត់ម៉ូតូចំនួន២០០គ្រឿង ម៉ាកស៊ុយហ្សុយគីឡេតដឹកតាមរថយន្ត២គ្រឿងនាំពីប្រទេសថៃចូលមកកម្ពុជាខុសច្បាប់រំលោភកម្មសិទ្ធិបញ្ញា និងមានការសង្ស័យនាំចូលលួចបន្លំគេងប្រវ័ញ្ញពន្ធរដ្ឋនោះផងដែរ។ការបង្រ្កាបម៉ូតូបានធ្វើឡើងកាលពីរសៀលថ្ងៃទី១៨ ខែមករា ឆ្នាំ២០១៨នៅមាត់ច្រកទ្វារព្រំដែនភ្នំដី ស្រុកសំពៅលូន។
ម៉ូតូម៉ាកស៊ុយហ្សុយគីឡេតត្រូវគេរាយការណ៍ឱ្យដឹងថាបានរងការឃាត់ពីសមត្ថកិច្ចគយ ស៊េរីឆ្នាំ២០១៧ ដែលឈ្មួញបាននាំចូលតាមច្រកតំបន់ភ្នំដី ស្រុកសំពៅលូន បម្រុងនាំឆ្ពោះទៅរាជធានីភ្នំពេញ។ការបង្រ្កាបនោះដែរត្រូវគេរាយការណ៍ឱ្យដឹងទៀតថា អនុវត្តតាមបណ្តឹងរបស់ក្រុមហ៊ុនCAMBODIA SUZUKI MOTOR ជាក្រុមនាំចូលផ្តាច់មុខនូវម៉ូតូម៉ាកស៊ុយហ្សុយគីឡេត សម្រាប់ប្រទេសកម្ពុជា។
លោក អ៊ុយ វិត ប្រធានការិយាល័យគយនិងរដ្ឋាករប្រចាំមាត់ច្រកទ្វារព្រំដែនភ្នំដី ប្រាប់ឱ្យដឹងថា ម៉ូតូទាំងនោះខាងសមត្ថកិច្ចគយឃាត់ទុកពីព្រោះក្រុមហ៊ុនអ្នកនាំចូលមិនទាន់រត់ការឯកសារបង់ពន្ធគ្រប់គ្រាន់ ដោយរងចាំក្រុមហ៊ុនអ្នកនាំចូលម៉ូតូនោះយកឯកសារត្រឹមត្រូវមកបង្ហាញខាងលោកនិងឱ្យមានការបង់ពន្ធ ទើបឱ្យចាកចេញទៅ។
លោកបញ្ជាក់ឱ្យដឹងទៀតថា ពាក់ព័ន្ធការនាំចូលម៉ូតូរំលោភកម្មសិទ្ធិបញ្ញាគឺខាងក្រុមហ៊ុនគេបានចរចារទាក់ទងគ្នាជាមួយខាងក្រុមហ៊ុននោះហើយ ខាងលោកគ្រាន់តែអនុវត្តតាមមាត់ច្រកទ្វារព្រំដែនតែប៉ុណ្ណោះ។
ជុំវិញបញ្ហានេះ បើតាមតំណាងក្រុមហ៊ុនCAMBODIA SUZUKI MOTOR ជាក្រុមនាំចូលផ្តាច់មុខនូវម៉ូតូម៉ាកស៊ុយហ្សុយគីឡេត សម្រាប់ប្រទេសកម្ពុជា ប្រាប់ឱ្យដឹងថា ខាងក្រុមហ៊ុនលោកបានដាក់ពាក្យប្តឹងទៅអគ្គនាយកដ្ឋានគយនិងរដ្ឋាករកម្ពុជារួចហើយ ហើយខាងក្រុមហ៊ុនក៏មិនអាចមានការសម្របសម្រួលចចារជាមួយនិងអ្នកនាំចូលម៉ូតូខាងលើនោះបានទេពីព្រោះជាការនាំចូលម៉ូតូរំលោភកម្មសិទ្ធិបញ្ញាខុសច្បាប់ប៉ះពាល់សិទ្ធិផ្តាច់មុខ និងប៉ះពាល់គុណផាពម៉ូតូ បញ្ហានេះក្រុមហ៊ុនលោកសុំឱ្យសមត្ថកិច្ចគយមានចាត់វិធានការតាមផ្លូវច្បាប់។
សូមរំលឹកថា កាលពីដើមខែធ្នូឆ្នាំ២០១៧ សមត្ថកិច្ចគយនៅរាជធានីភ្នំពេញបានបង្រ្កាបម៉ូតូម៉ាកស៊ុយហ្សុយគីឡេតនៅចំណុចចំណតរថយន្តផ្សារថ្មីចំនួន៤០គ្រឿងម្តងរួចមកហើយ នូវការនាំចូលរំលោភសិទ្ធិកម្មសិទ្ធិខុសច្បាប់។ការនាំចូលម៉ូតូម៉ាកស៊ុយហ្សុយគីឡេត៤០គ្រឿងនោះត្រូវគេរកឃើញថាឈ្មួញបានឃុបឃិតជាមួយនិងមន្រ្តីគយនៅមាត់ច្រកទ្វារព្រំដែន ដែលសេចក្តីរាយការឱ្យដឹងថាបាននាំតាមច្រកកំពង់ផែអន្តរជាតិស្វ័យតក្រុងព្រះសីហនុ ម៉ូតូស៊េរីឆ្នាំ២០១៧ បង់ពន្ធបញ្ចុះឆ្នាំ២០១២ ដែលជាការកិចកេងប្រវ័ញ្ញថវិការរដ្ឋផងនោះទៀត។
ការនាំឱ្យមានការនាំចូលនូវម៉ូតូម៉ាកម៉ាកស៊ុយហ្សុយគីឡេត រំលោភកម្មសិទ្ធិបញ្ញាខុសច្បាប់នោះហើយ។ទើបក្រុមហ៊ុនCAMBODIA SUZUKI MOTOR ជាក្រុមនាំចូលផ្តាច់មុខនូវម៉ូតូម៉ាកស៊ុយហ្សុយគីឡេតបានដាក់ពាក្យប្តឹងទៅអគ្គនាយកដ្ឋានគយនិងរដ្ឋាករកម្ពុជាឱ្យមានការទប់ស្កាត់ នៃការនាំចូលម៉ូតូម៉ាកស៊ុយហ្សុយគីឡេតពីសំណាក់ឈ្មួញខិលខូចនោះ៕សំ វិច្ឆិកា
