ភ្នំពេញ៖ រថយន្តRANGE ROVER បុករះម៉ូតូនិងរថយន្តជាច្រើនគ្រឿងបណ្ដាលឲ្យបុរសម្នាក់ស្លាប់និងរងរបួសធ្ងន់ ចំណែកអ្នកបើករថយន្តបង្កត្រូវប្រជាពលរដ្ឋចាប់បានវាយម្នាក់មួយដៃមួយជើងឡើងទ្រាមខ្លួន ។
ករណីគ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង៧និង១៥នាទីព្រឹកថ្ងៃសុក្រ ៩កើត ខែផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៣ ខែកុម្ភៈ ឆ្នាំ២០១៨ នៅចំណុចស្តុបទំនប់ទួលគោក ផ្លូវលេខ៧០ សង្កាត់ទួលសង្កែ ខណ្ឌឬស្សីកែវ ព្រុំប្រទល់ សង្កាត់ស្រះចក ខណ្ឌដូនពេញ រាជធានីភ្នំពេញ ។
សពឈ្មោះ តាំង ប៉ូលី ភេទប្រុស អាយុ៦០ឆ្នាំ ស្នាក់នៅផ្លូវលេខ៦១០ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ។ ចំណែករថយន្តបង្កម៉ាករ៉េងរ៉ូវើ ពណ៌ខ្មៅពាក់ស្លាកលេខ ភ្នំពេញ 2T-1314 អ្នកបើកបររងរបួសធ្ងន់ ត្រូវប្រជាពលរដ្ឋចាប់បានវាយម្នាក់មួយដៃមួយជើងឡើងទ្រាមខ្លួន ។
តាមប្រភពព័ត៍មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុគេឃើញរថយន្តបង្កម៉ាករ៉េងរ៉ូវើ ពណ៌ខ្មៅពាក់ស្លាកលេខ ភ្នំពេញ 2T-1314 បើកបុកម៉ូតូមួយគ្រឿងទាំងកំរោល ហើយមិនព្រមឈប់បន្តបើកមកដល់ចំណុចកើតហេតុខាងលើ ក៏ជ្រុលទៅបុករ៉ឺម៉កលក់ផ្លែឈើខ្ទេច ហើយបុកម៉ូតូគៀបជាប់ក្រោមរថយន្តនៅចំណុចអង់តែនទួលគោកបណ្ដាលឲ្យបុរសម្នាក់ស្លាប់ភ្លាមៗ រួចរថយន្តបង្កបន្តបើកបញ្ច្រាសទិសទីបុករថយន្តលុច្សស៊ីស៣៣០មួយគ្រឿងទៀត រងការខូចខាតយ៉ាងដំណំ និងម៉ូតូជាច្រើនគ្រឿង ភ្លាមនោះប្រជាពលរដ្ឋនាំគ្នា ចាប់អ្នកបើកបរបានប្រគល់ឲ្យសមត្ថកិច្ចចាត់ការតាមច្បាប់ ៕អារុណរះ
