ខេត្តត្បូងឃ្មុំ ៖ ចម្ការអំពៅប្រមាណជាង៤ហិកតា ស្ថិតនៅភូមិឡ ឃុំកោងកាង ស្រុក ពញាក្រែក ខេត្តត្បូងឃ្មុំ បានរងការឆាបឆេះអស់ទាំងស្រុង នៅក្បាលព្រលប់ថ្ងៃអាទិត្យ ១១កើត ខែផល្គុន ឆ្នាំរកា នព្វស័ក ព.ស២.៥៦១ ត្រូវនឹងថ្ងៃទី២៦ ខែ កុម្ភៈ ឆ្នាំ ២០១៨ ខណៈសមត្ថកិច្ចជំនាញសហការគ្នាបានបាញ់ទឹកបង្ក្រាប និងទប់ស្កាត់កុំឲ្យ រាលដាល ។
សេចក្តីរាយការណ៍បានឲ្យដឹងថា ម្ចាស់ចម្ការអំពៅត្រូវបានគេស្គាល់ឈ្មោះ ឡុង ធាម ជាអភិបាលរងខេត្តត្បូងឃ្មុំ ដែលមានទីតាំងនៅចំណុចកើតហេតុខាងលើ ។
សេចក្តីរាយការណ៍បានឲ្យដឹងទៀតថា ក្នុងការបង្ក្រាបបាញ់ទឹកពន្លត់អគ្គិភ័យ កម្លាំងនគរបាលជំនាញប្រើប្រាស់ ឡានទឹកចំនួន៥គ្រឿង ដោយបាញ់ទប់ស្កាត់មិនអាចរីករាលដាល ដល់លំនៅឋានប្រជាពលរដ្ឋនៅក្បែរទីតាំងកើតហេតុនោះឡើយ ។
រហូតមកដល់ពេលនេះ នៅមិនទាន់ទទួលបានព័ត៌មានជាក់លាក់អំពីមូលហេតុដែលនាំឲ្យកើតគ្រោះអគ្គិភ័យនេះនៅឡើយទេ ខណៈកម្លាំងសមត្ថកិច្ចជំនាញកំពុងស្រាវជ្រាវ និងសួរនាំបន្តទៀត ៕ វណ្ណៈ
