ភ្នំពេញ៖ យ៉ាងហោចណាស់មានមនុស្ស៤នាក់រងរបួសធ្ងន់ស្រាល ដោយសារភាគីម្ខាងដែលស្រវឹងស្រាបើកម៉ូតូជ្រុលមកបុកម៉ូតូភាគីម្ខាងទៀត បណ្ដាលឲ្យម៉ូតូដួលកៀបជាប់លើគ្នា ឯអ្នកជិះខ្ទាតរងរបួស៤នាក់។
ករណីនេះបានកើតឡើងនៅវេលាម៉ោង៧ និង៣០នាទីយប់ថ្ងៃទី៦ ខែវិច្ឆិកា ឆ្នាំ២០១៥នៅតាមបណ្តោយផ្លូវវេងស្រេងមុខភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។
ប្រភពព័ត៌មានពីកន្លែងកើតហេតុបានឲ្យដឹងថា ម៉ូតូបង្កម៉ាកស្កុបពីពណ៌ស ពាក់ស្លាកលេខភ្នំពេញ1CU5943 បើកបរពីកើតទៅលិច ដោយស្ថានភាពស្រវឹងខ្លាំង។ រីឯម៉ូតូរងគ្រោះម៉ាកហុងដាឌ្រីម ពណ៌ខ្មៅ ពាក់ស្លាកលេខភ្នំពេញ1CT0191បើកបរពីកើតទៅលិចស្របទិសគ្នាជិះគ្នា៣នាក់រងរបួសធ្ងន់ម្នាក់ និងស្រាលម្នាក់។
តាមសម្ដីរៀបរាប់របស់ភាគីរងគ្រោះបានឲ្យដឹងថា មុនពេលកើតហេតុ ពួកគាត់កំពុងជិះឌុបគ្នាជាធម្មតា ស្រាប់តែមានឃើញម៉ូតូមួយគ្រឿងបើកបររេចុះរេឡើងពេញផ្លូវ ហើយក៏បានជ្រុលមកបុកម៉ូតូរបស់គាត់ចំផ្នែកខាងស្តាំ បណ្ដាលឲ្យបុកជាប់ ធ្វើឲ្យម៉ូតូគាត់ដួលគរលើម៉ូតូបង្កទៅវិញ។
ក្រោយពេលកើតហេតុម៉ូតូភាគីទាំពីរ បានចរចាដោះស្រាយគ្នាបញ្ចប់រឿង នៅកន្លែងកើតដោយភាគីម៉ូតូបង្កព្រមសងសំណងចំនួន១៥០ដុល្លារ ដើម្បីបញ្ចប់រឿងនៅកន្លែងកើតហេតុតែម្ដង៕
ដោយ៖ វិបុល
