ភ្នំពេញ៖ ជនសង្ស័យម្នាក់រួមនិងថ្នាំញៀនប្រភេទម៉ាទឹកកក ត្រូវបានកម្លាំងកងរាជអាវុធហត្ថខណ្ឌដូនពេញឃាត់ខ្លួន ដឹកនាំដោយលោកអនុសេនីយ៍ឯក លី គឹមឡេង មេបញ្ជាការរង អហដូនពេញ ស្រាវជ្រាវ និងល្បាតនៅតំបន់ផ្សារសុរិយាម៉ល ដែលជាទីតាំងចែកចាយគ្រឿងញៀនយ៉ាងសកម្ម ព្រោះទីតាំងនោះសំបូរទៅដោយបា បារាំងដែលជនបរទេសចូលចិត្តទៅសប្បាយហើយងាយស្រួលប្រើប្រាស់ផងដែរ ។
ករណីបង្ក្រាបនេះកើតឡើងកាលពីវេលាម៉ោង១៥និង៤៥នាទី ថ្ងៃទី០៨ ខែវិច្ឆិកា ឆ្នាំ២០១៥ ចំណុចចំណតរថយន្តក្នុងផ្សារសុរិយាម៉ល សង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ ។
លោកអនុសេនីយ៍ឯក លី គឹមឡេង មេបញ្ជាការរង អហដូនពេញ បានឲ្យដឹងថា ជនសង្ស័យឈ្មោះ ស៊ារ តុង ភេទប្រុស អាយុ៤០ឆ្នាំ មុខរបរមិនពិតប្រាកដ ស្នាក់នៅផ្ទះជួលប្លុកបឹងឈូក សង្កាត់ទឹកថ្លា ខណ្ឌសែនសុខ ។
វត្ថុតាងចាប់យកមាន: ក្រាមពណ៌សថ្លា ចំនួន០១កញ្ចប់និង០២ដុំតូច, ទូរស័ព្ទ អិនចុចពិល ចំនួន០១គ្រឿង។
បច្ចុប្បន្ន វត្ថុតាង និងជនសង្ស័យ ត្រូវបានបញ្ជូនទៅទីបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីកសាងសំណុំរឿងទៅតុលាការចាត់ការតាមច្បាប់ ៕
ដោយ៖ ស ដារ៉ា
