ភ្នំពេញ៖ បុរសម្នាក់ជិះម៉ូតូទាំងស្ថានភាពស្រវឹង ហើយក្នុងល្បឿនលឿនបានជ្រុលចង្កូតទៅបុកនិងរ៉ុម៉កម៉ូតូកង់បីចំពីមុខពេញទំហឹងបណ្ដាលឲ្យរងរបួសធ្ងន់ស្រាល២នាក់ទាំងសងខាង។
ហេតុការណ៍គ្រោះថ្នាក់ចរាចរណ៍ខាងលើនេះបានបង្កឲ្យមានការភ្ញាក់ផ្អើលដល់ប្រជាពលរដ្ឋដែលនៅក្បែរកន្លែងកើតហេតុ និងអ្នកធ្វើដំណើតាមដងផ្លូវ កាលពីវេលាម៉ោង១០និង៥០នាទីយប់ថ្ងៃទី០៨ ខែវិច្ឆិកា ឆ្នាំ២០១៥ នៅចំណុចក្រោយផ្សាររាត្រី ស្ថិតក្នុងសង្កាត់វត្តភ្នំ ខណ្ឌដូនពេញ។
បើតាមសាក្សីដែលនៅកន្លែងកើតហតុបានឲ្យដឹងថា មុនពេលកើតហេតុគេឃើញមានបុរសម្នាក់ជិះម៉ូតូមួយគ្រឿងម៉ាកវីវ៉ា ពណ៌ខ្មៅ ពាក់ស្លាកលេខ ពោធិសាត់ 1A.4499 ទិសដៅពីកើតទៅលិចតាមបណ្ដោយផ្លូវ១០៨ ខណៈមកដល់ចំណុចកើតហេតុកែងនិងផ្លូវ១៣ បានបទស្ដាំទៅជើងក៏បានជ្រុលទៅបុកជាមួយនិងរ៉ុម៉កម៉ូតូកង់បី ដែលបើកបរដោយបុរសម្នាក់ទិសដៅពីជើងទៅត្បួង(បញ្ច្រាស់ទិសគ្នា)មកចំពីមុខពេញទំហឹងបណ្ដាលឲ្យភាគីខាងម៉ូតូរងរបួសធ្ងន់ និងភាគីខាងរ៉ុម៉ករងរបួសស្រាល។
ក្រោយពេលកើតហេតុ ជនរងគ្រោះដែលរបួសធ្ងន់ត្រូវបានរថយន្តសាមុយដឹកយកទៅសង្គ្រោះនៅមន្ទីពេទ្យភ្លាមៗ រីឯម៉ូតូនិងរ៉ុម៉កម៉ូតូកង់បីត្រូវបានសមត្ថកិច្ចជំនាញធ្វើការវាស់វែងរួចយកទៅរក្សាទុកនៅអធិការដ្ឋាននគរបាលខណ្ឌ ដូនពេញ រងចាំដោះស្រាយគ្នាពេលក្រោយ។
សូមបញ្ចាក់ផងដែរថា ក្នុងករណីគ្រោះថ្នាក់ចរាចរណ៍ខាងលើនេះគឺបណ្ដាលមកពីភាគីខាងម៉ូតូជិះក្នុងស្ថានភាពស្រវឹងហើយជិះក្នុងល្បឿនលឿនមិនគោរពច្បាប់ចរាចរណ៍ ទើបបណ្ដាលឲ្យមានគ្រោះថ្នាក់រងរបួសធ្ងន់ដូច្នេះ ៕
ដោយ៖ ភារ៉ា
