ភ្នំពេញ៖ សិល្បករសិល្បការិនី ជាច្រើនរូបបានបង្ហាញវត្តមាន និងច្រៀងរាំ និងបង្កើតបរិយាកាសសប្បាយរីករាយក្នុងកម្មវិធីសម្ពោធភោជនីយដ្ឋាន ជេក ឃុន ។ កម្មវិធីនេះប្រារព្ធឡើងកាលពីរាត្រីថ្ងៃទី០១ខែឧសភានេះនៅទីតាំងភោជនីយដ្ឋានផ្ទាល់នាខាងកើតវិទ្យាល័យផ្សារដើមថ្កូវ។
តារាដែលបានចូលរួមក្នុងកម្មវិធីនេះមានដូចជា លោក ប៉ែន សារ៉ាវ កញ្ញា សុខ មុនីរក្សា កញ្ញា អ៊ឹម ដាលីស កញ្ញា សុខ ស្រីម៉ុច កញ្ញា ច័ន្ទ ស្រីម៉ី លោក Shutter ពូឈីវ លោកហេង សុវណ្ណារិទ្ធិ និងសិល្បករសិល្បការិនីជាច្រើនរូបទៀត។
អ្នកផលិតកម្មវិធីសិល្បៈលោក យ៉េបរ៉ូហ្វាត បានបញ្ជាក់ថាកម្មវិធីសម្ពោធហាងថ្មី ដែលមានសិល្បករចូលរួមជាច្រើននេះ គឺដោយសារតែម្ចាស់ហាងមានទំនាក់ទំនងល្អជាមួយសិល្បករ និងបានផ្តល់ឱកាសសម្រាប់សិល្បករបានចូលរួមបង្កបរិយាកាសប្បាយរីករាយសម្រាប់ភ្ញៀវចូលរួមក្នុងកម្មវិធីនេះផងដែរ។
ម្ចាស់ហាង ជេក ឃុនលោក ដេន ស៊ាងឃុន បានបញ្ជាក់ថា លោកពិតជារីករាយដែលហាងរបស់លោកបានបើកដំណើរការតាមការគ្រោងទុក និងចង់បាន ដែលពិសេសការផ្តល់វត្តមានចូលរួមពីសំណាក់សិល្បករ និងភ្ញៀវកិត្តិយសជាច្រើន។ លោកថាហាងបើកដំណើរការថ្មីនេះមានបម្រើសេវាកម្មអាហាពេលព្រឹក ថ្ងៃត្រង់ និងគ្រឿងក្លែមគ្រប់មុខនិងស៊ុបមានរស់ជាតិឆ្ញាញ់នៅពេលរសៀលនិងយប់។លោកថាហាងនេះបើកដំណើរការក្រោយពីលោកសង្កេតឃើញពីតម្រូវការងារទទួលទានអាហារទាំងបីពេលរបស់ប្រជាជនកម្ពុជាពិសេសនៅរាជធានីភ្នំពេញកាន់តែច្រើន និងនិយមចូលចិត្តអាហារប្លែកៗ។ លោករំពឹងថាហាងថ្មីនេះនឹងទទួលបានការគាំទ្រច្រើនពីអតិថិជន ហើយលោកបញ្ជាក់ដែរថាហាងថ្មីនេះនឹងក្លាយជាការស្ទាបស្ទង់មួយ ដែលលោកក៏មានគម្រោងបើកដំណើរការហាងធំជាងនេះដែលនឹងផ្តល់ឱកាសការងារសម្រាប់សិល្បករផងដែរ ហើយក៏រំពឹងដែរថាសិល្បករជាច្រើនឹងបន្តចូលរួមគាំទ្រដំណើរការហាងថ្មីនេះដែរ៕
ដោយ វឌ្ឍនា
