ភ្នំពេញ៖ យុវជនម្នាក់របួសធ្ងន់និងម្នាក់ទៀតស្លាប់ខណៈដែលកពុងជិះម៉ូតូម៉ាកស្តូបពី មួយគ្រឿងក៏ត្រូក្រុមចោរ៣នាក់ជិះម៉ូតូម៉ាកDukeប្រដាប់ដោយកាំភ្លើងខ្លីមួយដើមពីចង្កេះបាញ់ប្រហារចំនួន៣គ្រាប់តែប្លន់មិនបានសម្រេចនោះទេ ។

កាលពីវេលាម៉ោង៣ និង៣០នាទីយប់ថ្ងៃទី១៣ ខែវិច្ឆិកា ឆ្នាំ២០១៥ នៅចំណុចស្ពានអាកាសស្ទឹងមានជ័យតាម​បណ្តោយ​ផ្លូវ​២៧១ កែង​មុនី្នរ៉េត ស្ថិត​ក្នុង​សង្កាត់​ទំនប់ទឹក ខណ្ឌចំការមន រាជធានីភ្នំពេញ ។

យុវជនរងគ្រោះ មានឈ្មោះ ញ៉ែម  លី ភេទប្រុស អាយុ២៤ឆ្នាំ និងស្នាក់នៅម្តុំទឹកថ្លា ក្នុងសង្កាត់ទឹកថ្លា ខណ្ឌសែនសុខ ។ ចំណែកយុវជនរងគ្រោះម្នាក់ទៀតដែលបានស្លាប់មានឈ្មោះ វាសនា ភេទប្រុស អាយុ២៥ឆ្នាំ និងស្នាក់នៅម្ដុំស្ទឹងមានជ័យ ខណ្ឌមានជ័យ ។

តាមប្រភពព័ត៍មានពីសមត្ថកិច្ចបានប្រាប់ឱ្យដឹងថាមុនកើតហេតុយុវជនរងគ្រោះមានគ្នា៣នាក់ប្រុស២ស្រីម្នាក់បានជិះម៉ូតូមួយគ្រឿងម៉ាកស្តូបពីទើបតែចេញពីម្ដុំបឹងឈូករួចក៏ជិះតាមបណ្ដោយផ្លូវ២៧១ក្នុងទិសដៅពីជើងទៅត្បូង ខណៈមកស្ពានអាកាសស្ទឹងមានជ័យ ក៏បានជិះឡើងលើស្ពានក៏ស្រាប់តែលិចមុខជនសង្ស័យ៣នាក់ជិះម៉ូតូធំមួយគ្រឿងម៉ាកDukeមិនចាំស្លាកលេខ ក៏ធ្វើសកម្មភាពប្លន់យកម៉ូតូពីជនរងគ្រោះ តែជនរងគ្រោះមិនព្រមអោយពេលនោះជនសង្ស័យទាំង៣នាក់ក៏មានការខឹងសប្បារ យ៉ាងខ្លាំងក៏បានដកកាំភ្លើងខ្លីពីចង្កេះបាញ់ប្រហារមកលើជនរងគ្រោះចំនួន៣គ្រាប់ តែសំណាងក្នុងចំនោមទាំង៣គ្រាប់គឺ ត្រូវជនរងគ្រោះតែ២គ្រាប់ប៉ុណ្ណោះ ដោយមួយគ្រាប់ត្រូវចង្កេះបុរសដែលអង្គុយខាងក្រោយនិងគ្រាប់ទី២ត្រូវគូតបុរសដែលជាអ្នកឌុប។ ចំណែកស្រីម្នាក់ដែលរួមដំណើរដែលអង្គុយកណ្ដោលមិនបានត្រូវរបួសនោះទេ ។

ក្រោយកើតហេតុក្រុមចោរបានជិះចេញគេចខ្លួនបាត់សម្រោល ចំណែកជនរងគ្រោះបានខំប្រឹងជិះម៉ូតូទាំងត្រូវ គ្រាប់និងឈាមហូរ ទៅផ្ទះនៅឯទឹកថ្លាវិញខណៈពេលទៅដល់ផ្ទះ ខំប្រឹងស្រែកហៅបងប្អូនដែលនៅក្នុងផ្ទះដើម្បីឱ្យជួយដឹកយកមកសង្គ្រោះបន្ទាន់នៅមន្ទីរពេទ្យលោកសង្ឃនិងម្នាក់សង្គ្រោះបន្ទាន់នៅមន្ទីរពេទ្យរុស្សីុតែដោយសារតែមុខរបួសអ្នកដែលអង្គុយខាងក្រោយធ្ងន់ពេកក៏បានស្លាប់ភ្លាមៗ ៕

ដោយ៖ ស រស្មី