ភ្នំពេញ៖ បុរសចំណាស់ម្នាក់ បានបែកក្បាលបាក់ជើងស្លាប់ភ្លាមៗនៅនឹងកន្លែង ខណៈរូបគាត់បានដើរឆ្លងផ្លូវត្រូវរថយន្តដឹកដី ទម្ងន់៥តោនមួយគ្រឿងបើកមកបុក  ។

កាលពីវេលាម៉ោង៣ទៀបភ្លឺ ថ្ងៃទី១៣ ខែវិច្ចិកា ឆ្នាំ២០១៥ នៅតាមបណ្តោយផ្លូវជាតិលេខ៤ ស្ងិតក្នុងភូមិព្រៃស្វាយ សង្កាត់ចោមចៅ ខណ្ឌពោធិ៍សែនជ័យ​ ហើយរថយន្តបង្កបានបើកគេចបាត់ស្រមោល ។

តាមសាក្សី​នៅកន្លែងកើតហេតុបានអោយដឹងថា​នៅមុនពេលកើតហេតុ​  គេឃើញបុរសខាងលើទំនងជាមានសតិមិនល្អបានដើរចុះឡើងនៅម្តំុនោះ ហើយដៃមានកាន់ដំបងឈើប្រវែងជាងមួយមែត្រ កាន់ក្រវីចុះឡើងៗ លុះក្រោយមកបុរសនោះបានដើរឆ្លងផ្លូវពីត្បូងទៅជើង ខណៈពេលដើរឆ្លងផ្លូវជិតផុត ក៏មានរថយន្តប៊ែនដឹកដីទម្ងន់៥តោន ពណ៍ខៀវមិនចាំស្លាកលេខបើកមកពីកើតទៅលិចក្នុងល្បឿនលឿនប្រដេញគ្នា ជាមួយរថយន្តដឹកដីមួយគ្រឿងទៀត ក៏មកបុកចំបុរសរងគ្រោះបើុងជាង ៥០មែត្រ បណ្តាលអោយគាត់បាក់ក បែកក្បាល បាក់ជើងទាំង២ ស្លាប់ភ្លាមៗនៅនិឹងកន្លែងតែម្តង ហើយរថយន្តបង្កក៏បានបើកគេចខ្លួនបាត់។ ប្រភពដដែលបន្តថា បុរសខាងលើទំនងជាជនអនាថា ហើយមិនដែលឃើញ ទេនៅម្តំុនេះ ហើយឈ្មោះអ្វីក៏មិនស្គាល់ដែរ ។

ក្រោយពេលកើតហេតុ សពត្រូវបានសមត្ថកិច្ចបានយកទៅតម្កល់ទុកនៅវត្តពោធិ៍ចិនតុង រងចាំសាច់ញាតិមកទទួលយកទៅធ្វើបុណ្យតាមប្រពៃណីនៅស្រុកកំណើត ៕

ដោយ៖ សុខាសែនជ័យ