ភ្នំពេញ៖ យុវជនសង្ស័យម្នាក់ និងត្រូវនគរបាលព្រហ្មទណ្ឌខណ្ឌដង្កោ កសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ នាព្រឹកថ្ងៃទី១៤ ខែវិច្ឆិកា ឆ្នាំ២០១៥ ដើម្បីផ្តន្ទាទោសតាមច្បាប់ពាក់ព័ន្ធករណីលួច ។
ជនសង្ស័យឈ្មោះ ហួត សៀងហៃ ភេទប្រុស អាយុ២៣ឆ្នាំ មុខរបរមិនពិតប្រាកដ ស្នាក់នៅភូមិហា សង្កាត់ស្ពានថ្ម ខណ្ឌដង្កោ ត្រូវបានជនរងគ្រោះឈ្មោះ សូត កុសល ភេទប្រុស អាយុ៣៦ឆ្នាំ មុខរបរជំនួយការភូមិ ស្នាក់នៅផ្ទះលេខ៥៤០ ផ្លូវ៣៧១ ក្រុម១ ភូមិត្នោតជ្រុំ សង្កាត់បឹងទំពុន ខណ្ឌមានជ័យ ចាប់ប្រគល់ឲ្យសមត្ថកិច្ច កាលពីវេលាម៉ោង ៨ និង៣០នាទីព្រឹកថ្ងៃទី១២ ខែវិច្ឆិកា ឆ្នាំ២០១៥ នៅចំណុចផ្លូវលំ ភូមិហា សង្កាត់ស្ពានថ្ម ខណ្ឌដង្កោ រាជធានីភ្នំពេញ ។
សមត្ថកិច្ចប្រាប់ឲ្យដឹងថា កាលពីថ្ងៃទី២៩ ខែតុលា ឆ្នាំ២០១៥ វេលាម៉ោង១៧ និង០០នាទី ឈ្មោះ ស៊ុន ម៉ាឡាត់ (ត្រូវជាបងថ្លៃជនរងគ្រោះ) បានទៅខ្ចីខ្សែដៃ មាស ចំនួន ១ខ្សែ ទង្ងន់ ៥ជី ដើម្បីពាក់ចូលរួមពិធីបុណ្យអ្នកភូមិជាមួយគ្នា ស្ថិតភូមិហា សង្កាត់ស្ពានថ្ម ខណ្ឌដង្កោ រហូតដល់ថ្ងៃទី៨ ខែវិច្ឆិកា ឆ្នាំ២០១៥ វេលាម៉ោង ៧ និង៣០នាទី ឈ្មោះ ស៊ុន ម៉ាឡាត់ បានតេទូរស័ព្ទទៅប្រាប់ជនរងគ្រោះថា ប្អូនឯងមកផ្ទះបង ដើម្បីមកយកខ្សែកដៃទៅវិញ។ ពេលឮដូច្នេះជនរងគ្រោះក៏បានជិះម៉ូតូទៅដល់ផ្ទះបងស្រី ដើម្បីយកខ្សែដៃនោះត្រឡប់ទៅផ្ទះវិញ ស្រាប់តែរកខ្សែដៃនោះមិនឃើញសោះ។
សមត្ថកិច្ចប្រាប់បន្តឲ្យដឹងថា ភ្លាមនោះជនរងគ្រោះបានសួររកយុវជនសង្ស័យឈ្មោះ ហួត សៀងហៃ ក៏មិនឃើញទៀត ទើបរាយការណ៍ប្រាប់នគរបាលប៉ុស្តិ៍រដ្ឋបាលស្ពានថ្ម ឲ្យជួយរកយុវជនសង្ស័យ ប៉ុន្តែជនរងគ្រោះមិនបានដាក់ពាក្យបណ្តឹងនោះទេ លុះរហូតដល់វេលាម៉ោង ៨ និង៣០នាទីព្រឹកថ្ងៃទី១២ ខែវិច្ឆិកា ឆ្នាំ២០១៥ ក៏ប្រទះឃើញជនសង្ស័យនៅចំណុចផ្លូវលំ ភូមិហា សង្កាត់ស្ពានថ្ម ខណ្ឌដង្កោ ក៏ចាប់ឃាត់ខ្លួនប្រគល់ឲ្យសមត្ថកិច្ចតែម្តង ។
ក្រោយពីធ្វើការសាកសួរជំហ៊ានដំបូងនៅទីស្នាក់ប៉ុស្តិ៍ស្ពានថ្ម ក៏បានបញ្ជូនជនសង្ស័យបន្តមកទៅកាន់អធិការដ្ឋាននគរបាលខណ្ឌដង្កោ ចាត់ការតាមនីតិវិធី ៕
...
ដោយ៖ ភារ៉ា ដង្កោ
