ភ្នំពេញ៖ កម្លាំងនគរបាលការិយាល័យ ប្រឆាំងគ្រឿងញៀននៃស្នងការដ្ឋាននគរបាល រាជធានីភ្នំពេញ បានចុះបង្ក្រាបករណីជួញដូរគ្រឿងញៀនមួយកន្លែង ស្ថិតនៅ បន្ទប់លេខ១០៥ នៃផ្ទះសំណាក់លីហេងថ្មី ស្ថិតនៅតាមផ្លូវលេខ២៧១ សង្កាត់ផ្សារដើម ថ្កូវ ខណ្ឌចំការមន។
ក្រោយមកទើបបន្ដទៅបង្ក្រាបនៅក្រោម ស្ពានព្រះមុនីវង្ស សង្កាត់ច្បារអំពៅទី១ ខណ្ឌ ច្បារអំពៅមួយលើកទៀតដោយ ឃាត់ខ្លួនជនសង្ស័យពីរនាក់ និងដកហូតថ្នាំញៀន ចំនួន៥៩កញ្ចប់ដែលប្រតិបត្តិការនេះធ្វើឡើងនៅរសៀលថ្ងៃទី១១ ខែវិច្ឆិកា ឆ្នាំ២០១៥ ។
សមត្ថកិច្ចឲ្យដឹងថាជនសង្ស័យដែលត្រូវឃាត់ខ្លួនគឺជាអ្នកជួញដូរថ្នាំញៀនយ៉ាងសកម្ម មានទី១ ឈ្មោះសម្បត្ដិ ភក្ដី អាយុ ២៥ឆ្នាំ មុខរបរមិនពិតប្រាកដ ស្រុកកំណើត និងទីកន្លែងរស់នៅបច្ចុប្បន្នស្ថិតនៅភូមិអូរ អណ្ដូង សង្កាត់ព្រែកប្រា ខណ្ឌច្បារអំពៅនិង ទី២ ឈ្មោះសំ ចាន់ដារ៉ារិទ្ធ អាយុ២៦ឆ្នាំ មុខ របរមិនពិតប្រាកដ ស្នាក់នៅផ្ទះលេខ៥០ ផ្លូវ លេខ៣៦៩ ភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ។ខណៈដែលឃាត់ខ្លួនជនសង្ស័យទាំងពីរនាក់នោះដែរសមត្ថកិច្ចបានដក ហូតថ្នាំ៥៩កញ្ចប់ព្រមទាំងបានដកហូតម៉ូតូចំនួន២គ្រឿង ទូរស័ព្ទដៃមួយគ្រឿង និងថវិកាចំនួន១០ម៉ឺនរៀលផងដែរ ។
បន្ទាប់ពីឃាត់ខ្លួនជនសង្ស័យទាំងពីរនាក់រួចមកសមត្ថកិច្ចបាន បានបញ្ជូនពួកគេ ទៅកាន់សាលាដំបូងរាជធានីភ្នំពេញ ដើម្បី ផ្ដន្ទាទោសតាមផ្លូវច្បាប់នៅថ្ងៃទី១៣ ខែវិច្ឆិកា ឆ្នាំ២០១៥ ៕
ដោយ៖ ប្រាថ្នា
