(កំពង់ធំ) ៖ បុរសម្នាក់បានស្លាប់បាត់បង់ជីវិតដោយសារឆ្លងចរន្ត អគ្គិសនីពីម៉ូទ័រកាត់អុស ហេតុការណ៍នេះបានកើតឡើងនៅថ្ងៃទី១៥ ខែមិថុនា ឆ្នាំ២០១៨ ម៉ោង១៥.២០នាទី នៅភូមិប្រាសាទ ឃុំព្រះដំរី ស្រុកស្ទោង ខេត្តកំពង់ធំ។

នគរបាលមូលដ្ឋានបានឲ្យដឹងថា ជនរងគ្រោះមានឈ្មោះ ខៀវ យីម  ភេទប្រុស អាយុ៤៣ឆ្នាំ នៅភូមិ/ឃុំកើតហេតុខាងលើ។

តាមការបំភ្លឺពីប្រពន្ធជនរងគ្រោះឈ្មោះ  អុល ហ៊ង អាយុ ៣៧ឆ្នាំ បានបញ្ជាក់ថា: នៅម៉ោងប្រហែល ៣រសៀលរូបគាត់និងប្តីឈ្មោះ ខៀវ យីម បានមកពីជួយពង្រោះស្រូវវិញ ។បន្ទាប់មកប្តីបានអោយគាត់(ជាប្រពន្ធ)ដោតព្រីភ្លើងលើផ្ទះដើម្បីកាត់អុសនិងម៉ូទ័រ ពេលដោតរួច គាត់បោសផ្ទះសិន តែពុំលឺប្តីកាត់អុសទេ គាត់បានចុះមកមើល ឃើញប្តីត្រូវខ្សែរភ្លើងឆក់ដួលផ្ងាពោះ ដៃស្តាំក្តាប់ព្រីភ្លើង ដៃឆ្វេងក្តាប់ឌុយម៉ូទ័រ គាត់បានហៅអ្នកជិតខាងអោយជួយ និងរត់ទៅដកឌុយពីព្រីភ្លើងវិញ តែប្តីគាត់បានស្លាប់បាត់ទៅហើយ។

បន្ទាប់ពីទទួលបានព័ត៌មាននេះសមត្ថកិច្ចជំនាញបានចុះដល់កន្លែងកើតហេតុ ធ្វើការពិនិត្យសពឃើញថា៖ ជនរងគ្រោះមានស្នាមឆេះខ្លោចបាតដៃឆ្វេងនិងម្រាមដៃ ក្រៅពីនេះពុំមានស្លាកស្មាមអ្វីគួរអោយកត់សំគាល់ឡើយ។ ទើបសន្និដ្ឋានថា  ជនរងគ្រោះពិតជាស្លាប់ដោយខ្សែរភ្លើងឆក់ប្រាកដមែន ។

មូលហេតុ: ការធ្វេសប្រហែស របស់ជនរងគ្រោះ ចាប់ចំតំណរអត់រុំស្គុស បណ្តាលអោយឆក់ស្លាប់តែម្តង។