ភ្នំពេញ៖ យុវជនពីរនាក់ទំនងជាស្រវឹងបានបើករថយន្តលឿនមកបុករនាំងដែកពុះចែកទ្រូងផ្លូវបាក់អស់៥ផ្ទាំងរងការខូចខាត ហើយរថយន្តបង្ក បានបើករត់តែត្រូវសមត្ថកិច្ចឃាត់ជាប់ទាំងរថយន្តនិងម្ចាស់ ។
ហេតុការណ៍នេះបានកើតឡើងកាលពីរវេលាម៉ោង១១និង១០នាទីយប់ ថ្ងៃទី១៦ ខែវិឆ្ឆិកា ឆ្នាំ២០១៥ នៅតាមបណ្ដោយផ្លូវព្រះមុន្នីវង្ស ស្ថិតក្នុងសង្កាត់បឹងរាំង ខណ្ឌដូនពេញ ។
ប្រភពព័ត៌មានពីសមត្ថកិច្ចបានប្រាប់ឲ្យដឹងថា មុនពេលកើតហេតុគាត់សង្កែតឃើញមានរថយន្ត ម៉ាកTOYOTA RAV4 ពណ៌ទឹកប្រាក់ ពាក់ស្លាកលេខភ្នំពេញ2AC.1968 បើកបរដោយយុវជនពីរនាក់ហើយទំនងជាស្រវឹងជោកជាំបើកក្នុង ទិសដៅពីត្បួងទៅជើងក្នុងល្បឿនលឿនល្មម មិនបានប្រុងប្រយ័ត្ន បានបើកមកបុករនាំងដែកពុះចែកទ្រូងផ្លូវបាក់ទ្រែតអស់៥ផ្ទាំង ។
ប្រភពបានបន្តថា ក្រោយពេលកើតហេតុរថយន្តបង្កមិនបានឈប់នោះទេ គឺបានបន្ថែមល្បឿនបើកទៅមុខបន្តទៀត តែត្រូវបានសមត្ថកិច្ចមូលដ្ឋានជិះល្បាតក្នុងភូមិសាស្ត្រខាងលើនបានឃើញហេតុការណ៍នេះក៏បានជិះដេញបានប្រហែល៣០០ម៉ែត្រ ក៏ស្ទាក់ចាប់បានទាំងម្ចាស់និងរថយន្តភ្លាមៗតែម្ដង ។
ក្រោយពេលឃាត់បានរថយន្តនិងម្ចាស់ៗភ្លាមរួចហើយសមត្ថកិច្ចមូលដ្ឋានបានទំនាក់ទំនងទៅជំនាញមកធ្វើការវាស់វែង យករថយន្តបង្កនេះទៅរក្សាទុកនៅការិយាល័យចរាចរណ៍គោករាជធានីភ្នំពេញរង់ចាំដោះស្រាយគ្នាតាមផ្លូវច្បាប់ ៕
ដោយ៖ ព្រែកជ័យ
