ខេត្តកណ្តាល៖ មុខសញ្ញាចោប្លន់ម៉ូតូម្នាក់ក្នុងចំណោម២នាក់ត្រូវបានកម្លាំងនគរបាលប៉ុស្តិ៍ដីឥដ្ឋសហការជាមួយកម្លាំងនគរបាលព្រហ្មទណ្ឌស្រុកព័ទ្ធចាប់ខ្លួនបានទាំងយប់ ចំណែកបក្ខពួកវាម្នាក់ ទៀតលោតចូលក្នុងបឹងគេចខ្លួនបាត់ទោះបីជាមានប្រជាពលរដ្ឋនិងសមត្ថកិច្ចព័ទ្ធក៍ចាប់អត់បានដែរដោយសារយប់ងងិត ។
ករណីចាប់មុខសញ្ញាប្លន់ ម៉ូតូបានធ្វើឡើងនៅវេលាម៉ោ១០,៣០នាទីយប់ថ្ងៃទី១៩ ខែវិច្ឆិការ ឆ្នាំ២០១៥ បន្ទាប់ពីក្រុមជនសង្ស័យធ្វើសកម្មភាពប្លន់ម៉ូតូពីអ្នកគ្រូបង្រៀនម្នាក់មិនបានសម្រេចកាលពីវេលាម៉ោង៨,៤០នាទីយប់ថ្ងៃទី១៩ ខែវិច្ឆិការ ឆ្នាំ២០១៥ នៅលើផ្លូវជាតិលេខ១ ភូមិដីឥដ្ឋកោះផុស៣ ឃុំដីឥដ្ឋ ស្រុកកៀនស្វាយ ខេត្តកណ្តាល ។
ជនរងគ្រោះឈ្មោះជា សុខាន់ ភេទស្រី អាយុ៣៦ឆ្នាំ ជាគ្រូបង្រៀននៅវិទ្យាល័យជ័យវរ្ម័នទី៧ មានទីលំនៅភូមិស្តៅកន្លែង ឃុំដីឥដ្ឋ ស្រុកកៀនស្វាយ ជិះម៉ូតូម៉ាក ស៊ុយហ្សុយគី ឡេត ពណ៍ខ្មៅ ពាក់ស្លាកលេខ ភ្នំពេញ 1FD-4185 ។
ចំណែកជនសង្ស័យ មានឈ្មោះជួង កុសលមុនី ភេទប្រុស អាយុ៣១ឆ្នាំ គ្មានមុខរបរពិតប្រាកដ មានទីលំនៅភូមិឫស្សីស្រស់ សង្កាតនិរោធ ខណ្ឌច្បារអំពៅ ត្រូវសមត្ថកិច្ចចាប់ខ្លួន និងជនសង្ស័យម្នាក់ទៀតដែលរត់គេចខ្លួនមានឈ្មោះសូ លី ភេទប្រុស អាយុ២៩ឆ្នាំ គ្មានមុខរបរពិតប្រាកដ មានទីលំនៅភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ ។
លោកអ៊ុង ស៊ីឡាក់ នាយ ប៉ុស្តិ៍នគរបាលដីឥដ្ឋបានអោយដឹងថា មុនពេលក្រុមជន សង្ស័យធ្វើសកម្មភាព នារីរងគ្រោះជិះម៉ូតូតែម្នាក់ឯងចេញមកពីបង្រៀនគួរក្រៅម៉ោងសំដៅទៅផ្ទះធ្វើដំណើរក្នុងទិសដៅពីភ្នំពេញទៅកៀនស្វាយ ។ ចំណែកជនសង្ស័យ ទាំង២នាក់ជិះម៉ូតូកញ្ចាស់១គ្រឿងឌុបគ្នាតាមនារីរងគ្រោះពីក្រោយ ។ មកដល់កន្លែង ស្ងាត់ជនសង្ស័យបានធ្វើសកម្មភាពធាក់ម៉ូតូនារីរងគ្រោះបណ្តាលអោយដួល រួចហើយ ជនសង្ស័យម្នាក់បានស្ទុះទៅយកម៉ូតូហើយដាល់នារីរងគ្រោះចំមុខ២ដៃឡើងប៉ោង ។ គ្រានោះនារីរងគ្រោះបានស្រែកអោយអ្នកភូមិជួយអន្តរាគមន៍ បន្ទាប់មកប្រជាពលរដ្ឋបាន ផ្តល់ពត៍មានដល់កម្លាំងនគរបាលប៉ុស្តិ៍ ។
លោកនាយប៉ុស្តិ៍បានបន្តថា ពេលប្រជាពលរដ្ឋកិច្ចដេញចាប់ជនសង្ស័យបានផ្តួលម៉ូតូចោលហើយរត់ចូលទៅក្នុងផ្ទះអ្នកភូមិទើបចាប់ខ្លួនបាន ដោយឡែកបក្ខពួកជនសង្ស័យម្នាក់ទៀតបានរត់ចូលព្រៃបឹង ហើយត្រូវប្រជាពលរដ្ឋនិង សមត្ថកិច្ចរុករកដែរតែមិនឃើញឡើយ ណាមួយយប់ងងិត ទៀត ទើបធ្វើអោយជន សង្ស័យរត់គេចខ្លួនរួច ។ ក្នុងការដេញចាប់មុខប្លន់នេះដែរសមត្ថកិច្ចដកហូតបានម៉ូតូរបស់ជនសង្ស័យមួយគ្រឿងម៉កញ្ចាស់១គ្រឿង ម៉ាក សង់កូរ៉េ ផ្លើស អត់ស្លាកលេខ ចំណែកម៉ូតូរបស់ជនរងគ្រោះក៍ដកហូតបានមកវិញដែរ ។
លោកវង សែ អធិការរង ទទួលការងារព្រហ្មទណ្ឌស្រុកៀនស្វាយបានអោយដឹងថា ជនសង្ស័យជាមុខសញ្ញាប្លន់រួមជាមួយម៉ូតូដែលជាមធ្យោបាយជិះធ្វើសកម្មភាពត្រូវបញ្ជូនមកកាន់អធិការដ្ឋាននគរបាលស្រុកដើម្បីកសាងសំណុំរឿងទៅតុលាការ ដើរតាមច្បាប់ជនសង្ស័យជាប់ពីបទ “ លួចមានស្ថានទម្ងន់ “ ពាក្យសាមញ្ញហៅថា ប្លន់ ដោយឡែកម៉ូតូរបស់ជនរងគ្រោះរងចាំការសម្រេចពីលោកព្រះរាជអាជ្ញាអមសាលាដំបូងខេត្ត ទើបសមត្ថកិច្ចហ៊ានប្រគល់អោយម្ចាស់វិញ ៕
ដោយ៖ សណ្តោស
