កណ្ដាលៈ ក្មេងប្រុសសិស្សសាលាម្នាក់បានជិះ កង់មកពីសាលា ត្រូវបានរថយន្តដឹកទឹកសុទ្ធមួយគ្រឿងបើកខ្វះការប្រុងប្រយ័ត្ន បានពៀរ កិនបណ្ដាលឲ្យស្លាប់ក្នុងថ្លុកឈាមយ៉ាងអណោចអធ័ម នៅថ្ងៃទី៣ សីហា ឆ្នាំ២០១៨  វេលាម៉ោង១៣និង៤៥នាទី លើផ្លូវលំ ចំណុចភូមិព្រែកផ្ដៅ ឃុំរការកោង១ ស្រុកមុខកំពូលខេត្តកណ្តាល។
មន្ត្រីនគរបាលចរាចរណ៍ស្រុកមុខកំពូលបានឲ្យដឹងថា រថយន្តបង្ករម៉ាកហ៊ីយ៉ាន់ដាយ (កូរ៉េ) ពណ៍ស ពាក់ផ្លាកលេខភ្នំពេញ2F-7049 បើកបរដោយឈ្មោះ ស ឡា ភេទប្រុស អាយុ៥៤ឆ្នាំ មានទីលំនៅភូមម្រេញ ឃុំគរស្រុក ព្រៃឈរខេត្តកំពង់ចាម  ។ ចំណែកក្មេងប្រុសរងគ្រោះជាអ្នកជិះកង់ឈ្មោះ ស្រស់  ម៉េងស្រុឺ ភេទប្រុស អាយុ១៣ឆ្នាំ មានទីលំនៅ ភូមិព្រែកផ្ដៅ ឃុំរការកោង១ ស្រុកមុខកំពូល ខេត្តកណ្ដាល ។
ប្រភពដដែលបន្តថា នៅមុនពេលកើតហេតុ សាក្សីបានឃើញក្មេងប្រុសរងគ្រោះជិះកង់ចេញពីសាលារៀនក្នុងទិសដីពីត្បូងមកជើង លុះជិះមកដល់ចំណុចកើតហេតុ ក៏មានរថយន្តកូរ៉េដឹកទឹកសុទ្ធមួយគ្រឿង បើកក្នុងទិសដៅស្របគ្នា ក៏បានមកពៀរកង់ក្មេងប្រុសរងគ្រោះ បណ្ដាលឲ្យដួល និងកិនស្លាប់តែម្ដង ។
ក្រោយពីទទួលព័ត៍មាន សមត្ថកិច្ចជំនាញ បានចុះទៅដល់កន្លែងកើតហេតុ ហើយបានធ្វើការវាស់វែង និងយកមធ្យោយទាំងពី មករក្សាទុកនៅអធិការដ្ឋាននគរបាលស្រុកមុខកំពូល ចំណែក
សព ជំនាញបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។ឯជនសង្ស័យឈ្មោះ ស ឡា បានឃាត់ខ្លួនយកមកអធិការដ្ឋាននគរបាលស្រុកមុខកំពូលដើម្បីសាក់សួរ។
តាមការស្និដ្ឋានរបស់សត្ថកិច្ចបានឲ្យដឹងថា គ្រោះថ្នាក់ខាងលើ បណ្ដាលមកពីអ្នកបើកបររថយន្ត បើកខ្វះការប្រយ័ត្ន ទើបបានជាបុកពៀរក្មេងប្រុសយ៉ាងដូច្នេះ ៕ស្អាងជ័យ