ខេត្ដតាកែវ៖ ក្រុមអ្នកនេសាទជា លក្ខណៈគ្រួសារយ៉ាងហោចណាស់ជាង ១រយគ្រួសារ កាលពីព្រឹកថ្ងៃទី២០ ខែ វិច្ឆិកា ឆ្នាំ២០១៥ បានលើកគ្នាទៅតវ៉ា នៅខាងមុខសាលាស្រុកអង្គរបុរីដើម្បី ស្នើសុំរក្សាទុកសម្រាស់ឱ្យត្រីជ្រករបស់ពួកគាត់ ។
ក្រុមអ្នកតវ៉ាទាំងនោះបានលើកឡើងថា សម្រាស់របស់ពួកគាត់មានមែក ឈើត្រឹម២០-៣០មែក គ្រាន់ឱ្យត្រីជ្រក ដើម្បីនេសាទយកមកធ្វើប្រហុក-ផ្អក ចិញ្ចឹមជីវភាពគ្រួសារ ។ ប៉ុន្ដែជាញយដង ត្រូវបានសមត្ថកិច្ចចុះរុះរើគ្មានសល់ ។ ពួក គាត់ក៏បានលើកឡើងផងដែរថា ចំណែក ជនជាតិវៀតណាមវិញត្រូវបានលោក ឈឹម ប៊ុនថន នាយផ្នែករដ្ឋបាលជលផល អង្គរបុរីលក់ដាយត្រី-បង្កងឱ្យ នៅចំណុច ស្ទឹងសណ្ដែក ក្នុងឃុំអង្គរបុរី ស្រុកអង្គរ បុរី ក្នុងតម្លៃ៣ពាន់ដុល្លារ ហើយបាន បើកដៃឱ្យពួកគេនេសាទដោយសេរី ។
ក្នុងស្ថានភាពបែបនេះគេឃើញ លោក ឌឹម គឹមសាន្ដ អភិបាលស្រុក អង្គរបុរីចាក់សោទ្វារបន្ទប់រួចគេច ចេញភ្លាមៗ ។
ទាក់ទងការចោទប្រកាន់ខាងលើ លោក ឈឹម ប៊ុនថន នាយផ្នែករដ្ឋបាល ជលផលអង្គរបុរីមិនអាចសុំការបំភ្លឺបានទេ ។ ប៉ុន្ដែយ៉ាងណាក៏ដោយលោកឡាយ វណ្ណៈ អភិបាលខេត្ដតាកែវបានថ្លែងថា ប្រជាពលរដ្ឋទាំងនោះគួរទៅធ្វើការតវ៉ា នៅស្នាក់ការជលផលទើបត្រូវ ។
ប្រជាពលរដ្ឋនិយាយថា សម្រាស់ តូចតាចនេះគ្រាន់នឹងបានត្រីសម្រាប់ធ្វើ ប្រហុក ផ្អក ហើយមិនប៉ះពាល់ ដល់ពូជ ត្រីនោះទេ ។ ប្រជាពលរដ្ឋទាំងនោះស្នើឱ្យ អាជ្ញាធរស្រុក-ខណ្ឌ និងរដ្ឋបាលជលផល មេត្ដាអនុគ្រោះឱ្យពួកគាត់បានដាក់ សម្រាស់នោះផង ៕
ដោយ៖ ហេង នរិន្ទ្រ
