ខេត្ដស្ទឹងត្រែង៖ នគរបាលព្រហ្ម ទណ្ឌកម្រិតធ្ងន់ ខេត្ដស្ទឹងត្រែង សហការ ជាមួយនគរបាលខេត្ដពោធិ៍សាត់បាន ឃាត់ខ្លួនជនសង្ស័យ២នាក់ដែលជាឃាតកសម្លាប់មនុស្ស២នាក់ កាលពីថ្ងៃទី១៣ ខែមីនា ឆ្នាំ២០១៤ នៅភូមិភ្លុក ឃុំភ្លុក ស្រុកសេសាន ខេត្ដស្ទឹងត្រែង កន្លងទៅ ដោយមានដីកាចាប់ខ្លួនចេញពីសាលា ដំបូងខេត្ដស្ទឹងត្រែង និងតុលាការខេត្ដ ពោធិ៍សាត់ពេលដែលជនសង្ស័យបានរត់គេចខ្លួនទៅធ្វើកម្មករសំណង់នៅខេត្ដពោធិ៍សាត់អស់រយៈពេលជាង២ឆ្នាំ ។
ការឃាត់ខ្លួនជនសង្ស័យទាំង២នាក់ នេះបានធ្វើឡើងកាលពីថ្ងៃទី១៩ ខែវិច្ឆិកា ឆ្នាំ២០១៥ ស្ថិតក្នុងភូមិប្រមោយ ឃុំ ប្រមោយ ស្រុកវាលវែង ខេត្ដពោធិ៍ សាត់ ។ សមត្ថកិច្ចបានឱ្យដឹងថា ជន សង្ស័យឈ្មោះ តុង នឿន ភេទប្រុស អាយុ ២៣ឆ្នាំ រស់នៅ ឃុំព្រងិល ស្រុកភ្នំក្រវាញ ខេត្ដពោធិ៍សាត់, ទី២-ឈ្មោះ មឿន ចាន់ថុន ហៅ មីញ ភេទប្រុស អាយុ ២៥ឆ្នាំ រស់នៅភូមិអូរស្រាវ ឃុំព្រងិល ស្រុកភ្នំក្រវាញ ខេត្ដពោធិ៍សាត់ ។
លោកវរសេនីយ៍ទោ សឹង សុភ័ក្រ នាយការិយាល័យនគរបាលព្រហ្មទណ្ឌ កម្រិតធ្ងន់នៃស្នងការដ្ឋាននគរបាលខេត្ដពោធិ៍សាត់បានប្រាប់ឱ្យដឹងថា ជុំវិញការ ចាប់ខ្លួនជនសង្ស័យទាំង២នាក់ខាងលើ ធ្វើឡើងដោយមានបញ្ជា និងកិច្ចសហ ការគ្នារវាងព្រះរាជអាជ្ញាអមសាលាដំបូងខេត្ដស្ទឹងត្រែង នឹងព្រះរាជអាជ្ញាអម សាលាដំបូងខេត្ដពោធិ៍សាត់បានឃាត់ខ្លួនខណៈជនសង្ស័យឈ្មោះ តុង នឿន បានជាប់ ពាក់ព័ន្ធនឹងចម្លើយសារភាពរបស់ឈ្មោះ មឿន ចាន់ថុន ហៅ មីញ ដែលត្រូវបាន សមត្ថកិច្ចឃាត់ខ្លួនកាលពីថ្ងៃទី១៨ ខែ វិច្ឆិកា ឆ្នាំ២០១៥ ដោយយោងតាមដីកា បង្គាប់លេខ៣១២ដកបចខ ចុះថ្ងៃទី២២ ខែសីហា ឆ្នាំ២០១៤ របស់ចៅក្រមស៊ើប សួរនៃសាលាដំបូងខេត្ដស្ទឹងត្រែង ខណៈ ជនសង្ស័យរូបនេះជាប់ពាក់ព័ន្ធពីបទ ប្រព្រឹត្ដអំពើឃាតកម្ម កាលពីថ្ងៃទី១៣ ខែឆ្នាំដូចបានបញ្ជាក់ខាលើ ។
ជនសង្ស័យនៅពេលដែលនាំខ្លួនមក ដល់ស្នងការដ្ឋានខេត្ដស្ទឹងត្រែងបានសារភាពថា ពួកគេពិតជាបានធ្វើអំពើមនុស្ស ឃាតពិតប្រាកដមែន ។ មូលហេតុដែល ពួកគេវាយសម្លាប់ជនរងគ្រោះនោះគឺ មុនដំបូងពួកគេកំពុងតែផឹកស្រានៅក្នុងហាង១កន្លែងស្ថិតក្នុងភូមិ-ឃុំខាងលើ ដែលថៅកែហាងជានារីដែលខ្លួនស្រលាញ់ ។ ក្រោយមកទៀតពួកគេក៏បានប៉ះពាក្យ សម្ដីជាមួយជនរងគ្រោះបន្ទាប់ពីមានទំនាស់ពាក្យសម្ដីគ្នាជាមួយនិងជនរងគ្រោះក្នុងរឿងស្រីស្នេហ៍រួចពួកគេក៏នាំគ្នាស្ទាក់ព្រួតវាយសម្លាប់ជនរងគ្រោះតែម្ដងទៅ ។
បច្ចុប្បន្នជនសង្ស័យទាំង២នាក់ខាង លើត្រូវបាននគរបាលព្រហ្មទណ្ឌកម្រិត ធ្ងន់ខេត្ដស្ទឹងត្រែងបញ្ជូនខ្លួនមកដល់ស្នងការដ្ឋាននគរបាលខេត្ដស្ទឹងត្រែង កាលពី វេលាម៉ោង៣និង៣០នាទីរសៀលថ្ងៃ ទី២០ ខែវិច្ឆិកា ឆ្នាំ២០១៥ ដើម្បីសាក សួរបន្ថែម ព្រមទាំងកសាងសំណុំរឿង បញ្ជូនខ្លួនបន្ដទៅកាន់តុលាការខេត្ដស្ទឹងត្រែងដាក់ទោសកំហុសតាមច្បាប់ ៕
ដោយ៖ ហេង នរិន្ទ្រ
