ភ្នំពេញ៖ កាលពីវេលាម៉ោង១០ព្រឹក ថ្ងៃសៅរ៍ ទី២១ ខែវិច្ឆិកា ឆ្នាំ២០១៥ កីឡាករ រិទ្ធ អារុណ មកពីសមាគម ក្រសួងការពារជាតិបានប្រកួតចាញ់ កីឡាករ យ៉ត សាយ៉ាម ក្នុងប្រភេទទម្ងន់ ៦៥គីឡូក្រាម ខណៈដែលកីឡាករ រឿង សោភ័ណ្ឌ មកពីក្លិបមកុដរាជសីហ៍បាន ត្រឹមស្មើពិន្ទុជាមួយអ្នកប្រដាល់ថៃឈ្មោះ ថៃ អូឡេក ក្នុងប្រភេទទម្ងន់៥៩គីឡូ ក្រាមនៅលើសង្វៀនទូរទស្សន៍អាស៊ី អាគ្នេយ៍ ។
ជំនួបប្រកួតរវាងកីឡាករ រិទ្ធ អារុណ នឹង យ៉ត សាយ៉ាម បានធ្វើឱ្យទស្សនិក ជនចាប់អារម្មណ៍ជាខ្លាំងនៅមុនពេល ប្រកួតបន្ទាប់ពីបានឃើញតួលេខប្រកួតរបស់កីឡាករទាំង២នាក់ ។ ក្នុងនោះ រិទ្ធ អារុណ ធ្លាប់ឡើងសង្វៀនបាន១០៥ដង ឈ្នះ៨៧ ដង ចាញ់១៦ដង ស្មើ២ដង រីឯ យ៉ត សាយ៉ាម ធ្លាប់ឡើងសង្វៀន៧៥ដង ឈ្នះ៦៥ដង ចាញ់៩ដង ស្មើ១ដង ។
តួលេខប្រកួតខាងលើបានធ្វើឱ្យទស្សនិកជនខកចិត្ដនៅពេលបានឃើញកីឡា ករជាក់ស្ដែងនៅលើសង្វៀន ជាពិសេស យ៉ត សាយ៉ាម ។ គ្រាន់តែចាប់ផ្ដើមនៅ ទឹកទី១កីឡាករ រិទ្ធ អារុណ ហាក់ចាញ់ ប្រៀប យ៉ត សាយ៉ាម រួចទៅហើយគ្រាន់ តែសកម្មភាពវាយជាលក្ខណៈកម្ដៅ សាច់ដុំប៉ុណ្ណោះ ។
ទីបំផុតអ្នកប្រដាល់ថៃរូបនេះបាន យកឈ្នះកីឡាករ រិទ្ធ អារុណ ដោយពិន្ទុ ឯកច្ឆន្ទពីចៅក្រមទាំង៥រូប ។
ដោយឡែកការប្រកួតរវាងកីឡាករ រឿង សោភ័ណ្ឌ នឹង ថៃ អូឡេក ពួកគេ បានតស៊ូគ្នាពេញ៥ទឹកដែលជាលទ្ធផល បានត្រឹម ស្មើពិន្ទុគ្នាប៉ុណ្ណោះ ។
នៅព្រឹកថ្ងៃដដែលនោះដែរ ជំនួប ប្រកួតរវាងកីឡាករ សំណាង ឌីណា មក ពីក្លិបដួងសែនសុខគុនខ្មែរត្រូវកីឡាករ ផាន ផាត់យុទ្ធ មកពីក្លិបសាលវ័ន្ដកីឡា ប្រើស្នៀតជង្គង់អុកចំផ្ទៃមុខបណ្ដាលឱ្យ ដួលសន្លប់ភ្លាមៗ បើទោះបីអាជ្ញាកណ្ដាល រាល់ដល់១០ក៏មិនអាចបន្ដការប្រកួត បានដែរ ។ ការប្រកួតរវាងកីឡាករទាំង ២នាក់បានដំណើរការអស់រយៈពេល៤ទឹក ប៉ុន្ដែទឹកទី១ដល់ទឹកទី៣ ផាន ផាត់យុទ្ធ ពុំសូវប្រើកម្លាំងមួយរយភាគរយវាយ សងទៅលើ សំណាង ឌីណា ទេ ។ គ្រាន់ តែលើកជង្គង់ទប់ និងប្រើកណ្ដាប់ដៃវាយ តិចៗប៉ុណ្ណោះ ។ បន្ទាប់មកនៅដើមទឹកទី៤ ឌីណា បានចាប់ផ្ដើមបញ្ចេញស្នៀតជង្គង់ និងកណ្ដាប់ដៃម៉ាត់ទៅលើផ្ទៃមុខ ផាត់យុទ្ធ ជាហេតុធ្វើឱ្យ ផាត់យុទ្ធ ស្ទុះទៅចាប់ បង្វិលគូប្រកួត២ទៅ៣ជុំធ្វើឱ្យអាជ្ញាកណ្ដាលជួយ បំបែកមិនទាន់ ផាត់យុទ្ធ បានទាញក្បាល សំណាង ឌីណា មកអុកជាមួយជង្គង់បណ្ដាល ឱ្យសន្លប់ដេកដួលលើក្ដាររេញ ។ ជាលទ្ធផល អាជ្ញាកណ្ដាល និងគណៈកម្មការបាន សម្រេចឱ្យកីឡាករ ផាន ផាត់យុទ្ធ ឈ្នះ សំណាង ឌីណា ដោយចាត់ទុកថា ឌីណា បោះបង់ការប្រកួតនៅក្នុងទឹកទី៤ ៕
ដោយ៖ សារីម
