ភ្នំពេញ៖ប្រភពព័ត៌មាន បង្ហើបថា បន្ទាប់ពីអនុវត្តទោសបញ្ចប់ជាស្ថាពររយៈពេល១ឆ្នាំ៦ខែរួចមក លោក គឹម សុខ ដែលអះអាងថាជាអ្នកវិភាគសង្គម នឹងត្រូវដោះលែងចេញពីពន្ធនាគារព្រៃស នៅថ្ងៃទី១៧ ខែសីហា នេះ ។
ប្រភពព័ត៌មានគួរឱ្យទុកចិត្តបាន បង្ហើបឱ្យដឹងថា ខាងព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ទទួលបន្ទុកអគ្គនាយកដ្ឋានពន្ធនាគារ គឺ បានចេញដីកាដោះលែងលោកគឹម សុខ រួចហើយ ។ ការកំណត់ដោះលែង គឺ នឹងធ្វើឡើងនៅថ្ងៃទី១៧ ខែសីហា នេះ ។ ប៉ុន្តែការដោះលែង នៅពេលព្រឹក ឬ រសៀល នោះ គឺស្ថិតតាមការអនុវត្តជាក់ស្ដែង ។
ប្រភពព័ត៌មាន បន្តថា ការអនុវត្តទោស១ឆ្នាំ៦ខែនេះ គឺ ពាក់ព័ន្ធបទល្មើសញុះញង់ឱ្យប្រព្រឹត្តបទល្មើសជាអាទិ៍ ដែលចោទប្រកាន់ថាគណបក្សប្រជាជនកម្ពុជា នៅពីក្រោយខ្នងនៃអំពើឃាតកម្មលើបណ្ឌិត កែម ឡី ។
ទោះបីលោកគឹម សុខ ត្រូវបានដោះលែងនៅថ្ងៃទី១៧ ខែសីហា នេះ ក៏ដោយ តែសំណុំរឿងមួយករណីទៀត គឺ ចោទប្រកាន់ថា រាជរដ្ឋាភិបាលកម្ពុជា បានបង្កើតប្រព័ន្ធសម្លាប់មនុស្ស តែរកឃាតកមិនដែលឃើញ នោះ គឺកំពុងស្ថិតក្រោមចំណាត់ការតុលាការដដែល ៕ចេស្តា
